बिद्यार्थी आन्दोलन तिव्र बनेपछि अर्को आदेश नभएसम्मका लागि धनगढीमा निषेधाज्ञा जारी

धनगढी ।  बालिकालाई च्यापेर  मार्ने ग्रेडर चालकलाई कारवाहीको माग गर्दै शुरु भएको बिद्यार्थीहरुको आन्दोलन तिव्र बनेपछि जिल्ला स्थानीय प्रशासनले धनगढीमा निषेधाज्ञा लगाएको छ ।

जिल्ला प्रशासन कार्यालय कैलालीले बिहीवार राति सात बजेदेखि अर्को आदेश जारी नभएसम्मका लागि कफ्र्यु आदेश जारी गरेको छ । कैलालीका प्रमुख जिल्ला अधिकारी किरण थापाद्धारा जारी गरिएको निषेधाज्ञा प्रशासनले धनगढीको पुरानो फुलबारी बसपार्कदेखि रातो पुलसम्म तथा सामुदायिक प्रहरी केन्द्र हसनपुरदेखि वडा नम्बर १ र २ स्थित हुलाकी राजमार्गसम्म  लागु गरिएको छ ।

निषेधाज्ञाको समयमा ५ जना भन्दा बढी व्यक्ति एकै साथ आवतजावत, भेला, घुमफिर गर्न र सवार चालाउन पाउने छैनन् ।

बिहीवार बिहान कालिका कन्स्टक्सनको ग्रेडरले हसनपुरमा ठक्कर दिंदा पंचो दय माविमा कक्षा ८ मा अध्ययनरत १५ बर्षीय चेतना साउदको मृत्यु भएको थियो । ग्रेडरले बालिकालाई टक्कर दिएपछि ब्याक गरेर मारेको भन्दै बिहानैदेखि बिद्यार्थीहरु आन्दोलनरत छन् ।