गृहमन्त्री रवि लामिछानेको पहिलो निर्णय : निर्मला पन्तको न्यायको पहल गर्ने

काठमाण्डौं । उपप्रधान तथा गृहमन्त्री रवि लामिछानेले कञ्चनपुरमा बलात्कारपछि हत्या गरिएकी निर्मला पन्तको न्यायका लागि पहल गर्ने निर्णय गरेका छन् ।

गृह मन्त्रालयको सोमबार  पदभार ग्रहण गर्दै उपप्रधान तथा गृहमन्त्री लामिछानेले निर्मला पन्तको न्यायका लागि पहिल गर्ने पहिलो निर्णय गरेका हुन् ।

कञ्चनपुर भीमदत्त नगरपालिका २, उल्टाखामकी १३ वर्षीया बालिका निर्मला पन्तको १० साउन २०७५ मा बलात्कारपछि हत्या भएको थियो । उनको शव ११ साउन २०७५ मा उखुबारीमा फेला परेको थियो । पन्तको हत्या भएको चार वर्ष बितिसक्दा पनि प्रहरीले हत्यारा पत्ता लगाउन सकेको छैन ।

चार बर्ष अघि भएको निर्मलाको हत्याका बिषयमा लामिछानेले न्युज २४ टेलिभिजनको सीधा कुरा जनतासँग कार्यक्रममा पटक पटक समाचार र छलफल सँचालन गरेका थिए ।

निर्मला हत्यापछि नेपाल प्रहरीका चार जना प्रहरी महानिरीक्षक (आईजीपी ) नै फेरिएका छन् । निर्मलाको हत्या हुँदा नेपाल प्रहरीका आईजीपीमा सर्वेन्द्र खनाल थिए । उनको पालामा सुल्झाउन नसकेको निर्मला पन्त बलात्कार र हत्या त्यसपछि नियुक्त अर्का आईजीपी ठाकुरप्रसाद ज्ञवालीले समेत सुल्झाउन सकेनन् ।

त्यसपछि आईजीपी बनेका शैलेश थापा क्षेत्रीले पनि हत्यारा पत्ता लगाउन सकेनन् । अहिले धीरजप्रताप सिंह आईजीपी छन् ।  तर, पन्तका हत्यारा भने अझै पत्ता लाग्न सकेको छैन ।