सदस्यको हित नै सर्वोपरि हो  :  शाही

सहकारीको अवस्था अहिले कस्तो छ ?

विश्वव्यापी रुपमा देखिएको आर्थिक मन्दिका कारण अहिले समग्र वित्तीय क्षेत्रमा समस्या देखिएको छ । सहकारी क्षेत्र पनि त्यसबाट अछुतो छैन । तर अहिलेसम्म हिमशिखर बहु–उद्देश्यीय सहकारी संस्थाका सवै सूचकाङ्कहरु राम्रा छन् । त्यसको असर अहिलेसम्म देखिएको छैन । अहिलेसम्म संस्था स्वस्थ रहेको छ ।

अहिलेको अवस्थामा पनि सवै सूचकाङ्क राम्रो छ भन्नु भयो । त्यो कसरी सम्भव भयो ?

सहकारीमा सवै भन्दा महत्वपुर्ण पाटो भनेको त्यसका सदस्य हुन् । हिमशिखर बहुउद्देश्यीय संहकारीका सदस्यहरु संस्थाप्रति एकदमै प्रतिबद्ध छन् । हाम्रो सफलताको सवै भन्दा ठुलो शक्ति भनेको सदस्य इमान्दार हुनु नै हो । सदस्यले संस्था र संस्थाको अवस्थाको बारेमा राम्ररी बुझ्नु भएको छ । उहाँहरुले सवै कुराको निगरानी पनि गरिरहनु भएको छ । यो संस्था समुदायमा आधारित भएका कारण पनि राम्रो अवस्था छ ।

संचालक टीम र व्यवस्थापनले जहिले पनि सदस्यको हितलाई सर्वोपरि ठानेर काम गर्दै आएको छ । सचालक, व्यवस्थापन र सदस्यको सहकारिप्रतिको लगावको राम्रो संयोजनले सहकारी उत्कृष्ठ सेवा प्रदान गर्न, शेयर सदस्यहरुलाई प्रतिफल दिन सफल हुदै आएको छ ।

बित्तीय क्षेत्रमा जोखिम बढ्यो भन्ने हल्ला छ, त्यो जोखिम भनेको के हो ?

हरेक क्षेत्रमा अहिले जोखिम छ । त्यसैले वित्तीय तथा सहकारी क्षेत्रमा पनि समस्या देखिने गरेको छ । एउटा महत्वपुर्ण कुरा भनेको सुशासन कायम राखेर काम गर्ने संस्थाको जुनसुकै समस्यामा पनि सफलता पाउन सक्दछन् । संस्था आफ्नो उद्देश्यमा अडिक रहेर काम गर्ने हो भने कुनै समस्या हुदैन भन्ने हामीले बुझेका छौं । त्यसै अनुरुप हामीले काम गरिरहेका छौं । हामी आफ्नो उद्देश्य अनुसार चलेका कारण अहिलेको चुनौतीले खासै असर पनि गरेको छैन ।

जोखिम बढेको हल्ला किन आइरहेको छ त ?

वित्तीय क्षेत्र आफैमा संवेदनशिल क्षेत्र हो । अहिले सामाजिक सञ्चालको प्रयोग बढेसंगै त्यसमा विभिन्न अफवाह फैलाउने गतिविधि पनि पोष्ट्याइएका हुन्छन् । ती पोष्टहरु कति सत्य हुन् वा झटो हुन् भन्ने बारेमा कतिपय मानिसले राम्रोसंग अध्ययन नै नगरी धारणा बनाउने गरेको देखिन्छ । जसका कारण अहिलेको समस्या भइरहेको देखिन्छ ।

हिमशिखरमा तरलताको अवस्था कस्तो छ ?

हिमसिखरमा तरलताको हिसावले पुर्ण रुपमा सुरक्षित छं । सदस्यका आवश्यकतालाई हेरेर सहजै रुपमा ऋण पनि प्रावाह गरिरहेका छौं । ऋण प्रवाह गर्न हामीलाई कुनै समस्या पनि छैन ।

सहकारीले केका आधारमा लगानी गर्ने गरेको छ ?

हाम्रो मुख्य उद्देश्य भनेको हाम्रा शेयर सदस्यलाई उत्पादनसंग जोड्नु हो । त्यसै अनुसार हामीले सदस्यलाई उत्पादन क्षेत्रमा लगानी गर्ने गरेका छौं । संस्थाले उत्पादनमा जोडिएका सदस्यलाई सहयोग पुग्ने गरी ऋण प्रवाह गरिरहेको छ ।

हामीले ऋण प्रवाह गर्दा उनुत्पादन क्षेत्रलाई प्राथमिकता दिने गरेका छैनौं । हिमशिखर बहु–उद्देश्यीय सहकारी संस्थाले आफैले पनि कैलारी गाउँपालिकाको बिसनपुरमा आफ्नै जमिनमा २५–५० को संरचना बनाएर बीउ प्रशोधन केन्द्र सञ्चालन गरिरहेका छौं । अन्य सदस्यलाई पनि उत्पादन क्षत्रमा जोड्ने गरी हौसला प्रदान गर्ने गरेका छौं ।

बीउ उत्पादनसंग शेयर सदस्यलाई कसरी जोड्नुहुन्छ ?

बीउ उत्पादन गर्नुको मुख्य कारण हाम्रा कृषि क्षेत्रमा लागेका शेयर सदस्यदस्यलाई व्यवसायिक बनाउनु हो । हामी हाम्रा कृषक शेयर सदस्यलाई बीउ उत्पादन गर्न लगाउँछौं । किसानले उत्पादन गरेको बीउ हामीले खरिद गर्ने र संस्थाको बीउ प्रशोधन केन्द्रमा प्रशोधन गरी बजारीकरण गर्ने गर्ने हाम्रो योजना रहेको छ ।

शेयर सदस्यलाई के कस्ता सुबिधा दिन्छ शिमशिखरले ?

हिमशिखर बहु–उद्देश्यीय सहकारी संस्था हो । हामीले बचत र ऋणका अलावा शेयर सदस्यका लागि सदस्य राहत कोष सञ्चालन गरेका छौं । हरेक बर्ष शेयर सदस्य महिलाहरुलाई   सुत्केरी खर्च,  सदस्यको मृत्यु भएमा सदस्यका आश्रीत परिवारलाई क्रिया खर्च, प्रदान गर्दै आएका छौं । यसैगरी हामीले जेष्ठ सदस्यको सहारा हिमशिखर भन्ने कार्यक्रम पनि सञ्चालन गरेका छौं । सो कार्यक्रम अन्तरगत ३६ जना जेष्ठ सदस्यलाई हिडडुलमा सजिलो होस् भनेर लौरो वितरण गरिएको छ । साथै हामीले शेयर सदस्यलाई उपचारमा सघाउन नवजीवन अस्पताल, कान्तिपुर डेन्टल र धनगढी नेत्रालय संग सम्झौता गरेका छौं । त्यहाँ हाम्रा सदस्यलाई उपचारमा निश्चित छुटको व्यवस्था मिलाएका छौं ।

यसका अलावा संस्थाले सामाजिक उत्तरदायित्व अन्तरगत विभिन्न क्रियाकलाप गर्दै आएको छ । रक्तदान, अस्पतालमा रहेका विरामीलाई फलफूल वितरण कार्यक्रम गर्दै आएका छौं । कोभिडको समयमा हिमशिखरले विपन्न वर्गलाई खाद्यान्न लगायत स्वास्थ्य सुरक्षामा सामग्री वितरण गरेको थियो । अक्सिजन प्लान्ट स्थापनाका लागि पनि हामीले सहयोग गरेका छौं । सामाजिक उत्तरदायित्वका कार्यक्रमलाई हामीले बार्षिक कार्यक्रममा पनि समावेस गर्ने गरेका छौं ।

हामीले कृषक शेयर सदस्यलाई राहत प्रदान गर्नका लागि सुपथ मुल्यमा कृषि औजार पनि बिक्री गर्ने गरेका छौं । त्यसैगरी कृषि सामागी केन्द्र लिमिटेड, साल्ट ट्रेडिङबाट रासायनिक मल ल्याएर सदस्यलाई सुपथ मुल्यमा वितरण पनि गरिरहेका छौं ।