आयल निगमका पूर्वकार्यकारी निर्देशक भ्रष्टाचारी ठहर, १५ महिना जेल ९ करोड जरिवाना तोकियो

धनगढी । नेपाल आयल निगम लिमिटेडका पूर्वकार्यकारी निर्देशक गोपालबहादुर खड्का भ्रष्टाचारी ठहर भएका छन् । विशेष अदालत काठमाडौँले शुक्रबार खड्कालाई अकुत सम्पत्ति आर्जन गरी भ्रष्टाचार गरेको ठहर गरेको हो ।

उनीविरुद्ध अख्यितार दुरुपयोग अनुसन्धान आयोगले २०७५ पुसमा १८ करोड भन्दा बढी अवैध आम्दानी गरेको दाबीसहित भ्रष्टाचार मुद्दा दायर गरेको थियो । विशेष अदालतका अनुसार अध्यक्ष श्रीकान्त पौडेल सदस्य न्यायाधीशहरु शालिग्राम कोइराला र डा. श्री खुशी प्रसाद थारुको इजलासले अख्तियारको दाबीमा विशेषले आंशिक ठहर गरेको हो ।

विशेषले खड्कालाई १५ महिना कैद सजाय हुने सजाय सुनाएको छ भने ९ करोड १९ लाख ६ हजार ६३४ रुपैंया जरिवाना गर्न भनेको हो । खड्काले परिवारका सदस्यबाहेक अमिता लामा सोदेम्बाको नाममा सात करोड ५४ लाख ५७ हजार आठ ७५ रुपैयाँ लुकाइ राखेको तथ्य आयोगले विशेषमा पेश गरेको थियो ।

डिभिजन सडक कार्यालयको निर्देशकसमेत भएका खड्का प्राविधिक तर्फका निजामति कर्मचारी हुन् । खड्काले ५५ वटा बैंक वित्तीय संस्था तथा सहकारीमा नगद मात्र दुई करोड, ७१ लाख ५३ हजार चार सय २१ राखेको पाइएको थियो ।