नवजीवन सहकारीद्धारा २६६ सदस्यलाई ४२ लाख सहयोग

धनगढी ।  नवजीवन सहकारी संस्थाले एक बर्षमा २ शय ६६ शेयर सदस्यलाई ४२ लाख ८१ हजार सहयोग गरेको छ । सहकारीले शेयर सदस्य हितकोषबाट  सदस्यहरुलाई आर्थिक बर्ष २०७९।२०८० मा  औषधी उपचार, सुत्केरी खर्च र काजकिरिया खर्च बापत उक्त रकम सहयोग गरेको हो ।

नवजीवनले सबै भन्दा बढी १ शय ७ जना सदस्यलाई औषधी उपचार बापत २१ लाख ६६ हजार रुपैया सहयोग गरेको छ ।  शेयर सदस्य बिरामी भएमा सहकारीले दश हजारदेखि ३५ हजारसम्म र अंग प्रत्यारोपण गर्नु परेमा एक लाख सहयोग दिने गरेको छ ।

सदस्यहरुको लगानी र कारोवारका आधारमा नै  सहकारी संचालन हुने र मुनाफा पनि कमाउने भएकोले मुनाफाबाट सदस्यहरुलाई लाभान्वित बनाउन हितकोष मार्फत सहयोग गर्ने गरिएको नवजीवन सहकारीका  अध्यक्ष देब बहादुर बमले बताए । “सहकारी सदस्यहरुबाट नै संचालन हुने भएकोले यसको नाफाबाट सदस्यहरुले पनि सुविधा पाउनु पर्छ भनेर सदस्यहरुलाई जन्मदेखि मृत्युसम्म सुविधा दिइरहेका छौं ।”  अध्यक्ष बमले भने “यो कोषलाई अझै बढाएर सुविधामा थप बृद्धि गर्ने योजना छ ।” 

नवजीवन सहकारीबाट एक आर्थिक बर्षको अवधिमा  ७१  शेयर सदस्य  महिलाले सुत्केरी खर्च बापत ३ लाख ५५ हजार र ८८ शेयर सदस्यको मृत्युमा तिनका परिवारका सदस्यले १७ लाख ६० हजार रुपैया काजकिरिया खर्च पाएका छन् । शेयर सदस्य महिलाले बच्चा पाएमा  ५ हजारका दरले बढीमा दुई पटक सुत्केरी खर्च र शेयर सदस्यको मृत्यु भएमा सदस्यका परिवारले काजकिरिया खर्च बापत २० हजार पाउने गर्दछन् ।

नवजीवन सहकारीका संचालक समितिका सदस्य गोपाल पाठक सदस्यहरुलाई सहकारीप्रति अपनत्व बृद्धि गर्न शेयर सदस्य हितकोषबाट सदस्यहरुलाई अप्ठेरो परेको बेलामा सहयोग गर्ने गरिएको बताउँछन् ।   “सहकारीबाट अप्ठेरो बेलामा सहयोग पाउँदा अपनत्व बढ्छ ।”  पाठक भन्छन् “यसले सहकारीप्रति बिश्वास बढ्ने र सदस्यको सक्रियता पनि बढ्ने हुन्छ ।” 

नवजीवनका अध्यक्ष बम  सहकारीमा बचत र ऋणको कारोवार गरेका शेयर सदस्यहरुलाई  संरक्षित पुँजी फिर्ता कोषबाट मुनाफाको अंश दिने गरिएको र कारोवार नगरेकाहरुले पनि हितकोषबाट फाइदा पाइरहेको बताउँछन् ।

सदस्यहरुको  हितका लागि हितकोषको रकम अझै बढाउने  योजना रहेको अध्यक्ष बम बताउँछन् ।  नवजीवनले  मुनाफाको ५ प्रतिशत रकम हितकोषमा छुट्याउने गरेको छ ।  सहकारीको साधारण सभाको बेलामा सदस्यहरुलाई प्रदान गरिने यातायात खर्च बापतको ७ शय ५० रुपैयाबाट ५० रुपैया शेयर सदस्य हितकोषमा जम्मा गरेको थियो ।