दलहरुद्धारा ऐक्यवद्धता व्यक्त

धनगढी –

   रुकुम पश्चिममा भएको घटनाका दोषीलाई कारवाहीको माग गर्दै संयुक्त दलित संघर्ष समितिले धनगढीमा गर्दै आएको अनिश्चितकालीन धर्नामा राजनैतिक दलहरुले  ऐक्यवद्धता जनाएका छन् ।  धनगढीको पार्कमोडमा अनिश्चितकालीन धर्ना  शुरु भएको आज छैठौं दिन दलहरुले ऐक्यवद्धता जनाएका छन् ।

   धर्नामा ऐक्यबद्धता जनाँउदै  सुदूरपश्चिम प्रदेशका पूर्व मन्त्री एव साँसद दीर्घ सोडारीले मानव सभ्यता माथि नै प्रश्न उठ्ने गरी भएको रुकुम पश्चिमको घटना निन्दनीय भएको बताए । उनले सो घटनाको विरोधमा हुने आन्दोलनमा आफ्नो समर्थन रहेको बताए ।

  नेपाली कांग्रेस कैलालीका उप सभापति प्रकाश बहादुर बमले घटनामा संलग्नहरुको खोजी गरी कारवाही गर्न माग गरे । उनले छुवाछुत र जातिय विभेद मुक्त राष्ट्रमा एक समुदायले जातकै आधारमा अर्को समुदाय माथि गर्ने विभेद सह्य नहुने आफ्नो र आफ्नो पार्टीको धारणा रहेको बताए ।

  नेकपाका नेता तथा पुर्व संघीय साँसद हरि श्रीपाइलीले समतामुलक समाजका लागि संघर्ष गरेको भनिएकाहरुबाटै रुकुम पश्चिममा घटना भएकोले सो घटनामा संलग्नहरु माथि हदैसम्मको कारवाही गर्न माग गरे । जातीय विभेदका घटनामा कानून अनुसार कारवाही भए मात्रै यस्ता घटना नदोहिरिने उनको विश्वास छ ।

  नेपाल दलित संघका नेता नृप सुनारले राज्य संयन्त्र नै रुकुम पश्चिम घटनाका दोषीहरुलाई बचाउन लागि परेको आरोप लगाए ।

   जातिय उत्पीडित मुक्ति समाज कैलालीका अध्यक्ष चक्र बिकेले रुकुम पश्चिमको घटनाका दोषीहरु माथि कानूनी कारवाही नहुँदा आन्दोलन जारी राख्नुपर्ने बताए ।  ।

    रुकुम पश्चिम सोतीमा ६ जनाको ज्यान जाने गरी भएको घटनामा संलग्न माथि कानूनी कारवाही, मृतकहरुलाई सांस्कृतिक शहीद घोषणा गर्न र पीडित परिवारका सदस्यहरुलाई क्षतिपिुर्तिको माग राखेर संयुक्त दलित संघर्ष समिति सुदुरपश्चिम समिति धनगढीले जेठ २०  गतेदेखि धनगढीमा अनिश्चितकालीन धर्ना गर्दै आएको छ  ।