मोटरसाईकल दुर्घटना हुँदा सशस्त्र प्रहरीको मृत्यु

धनगढी

   कञ्चनपुरको कृष्णपुरमा मोटरसाइकल दुर्घटना हुँदा सशस्त्र प्रहरीमा कार्यरत एक महिलाको मृत्यु भएको छ । सोमबार बेलुका महेन्द्रनगरबाट धनगढी आइरहेको म १ प ८९१ नम्बरको मोटरसाइकल झाडीमा खस्दा महिलाको मृत्यु भएको हो ।

 पूर्व पश्चिम राजमार्ग अन्तर्गत कृष्णपुरको बनदेवी झाडीमा मोटरसाइकल खस्दा शसस्त्र प्रहरीमा कार्यरत तारा बोहराको मृत्यु भएको जिल्ला प्रहरी कार्यालय कञ्चनपुरले जनाएको  छ ।

 प्रहरी जवान चन्द्रबहादुर बोहराले चलाईरहेको मोटरसाईकल दुर्घटना भएको हो । उनी दुर्घटनामा मृत्यु भएकी २४ वर्षीया तारा बोहोराका श्रीमान हुन ।

 जिल्ला प्रहरी कार्यालय कंचनपुरका प्रहरी नायव उपरीक्षक अमर थापाले साइकल यात्रुलाई बचाउन खोज्दा मोटरसाईकल दुर्घटना भएको बताए । चालक चन्द्रवहादुरलाई सामान्य चोट लागेको उनले बताए । बझाङ घर भएका बोहरा ५ वर्ष पहिले प्रहरीमा भर्ना भएका थिए । उनी हाल जिल्ला प्रहरी कार्यालय कंचनपुरमा कार्यरत छन् ।

  दुर्घटनामा मृत्यु भएकी तारा बोहरा सशस्त्र प्रहरीमा दार्चुलामा कार्यरत रहेको प्रहरी नायव उपरीक्षक थापाले बताए ।