दाइजो कृषि सहकारी संस्था लि. को १२ औं वार्षिक साधारण सभा सम्पन्न

धनगढी । कैलालीको धनगढी उप–महानगरपालिका वडा नं ७ स्थित दाइजो कृषि सहकारी संस्था लिमिटेडको १२ औं वार्षिक साधारण सभा सम्पन्न भएको छ ।

सो अवसरमा भूमि ब्यवस्था कृषि तथा सहकारी मन्त्री रामेश्वर चौधरीले सहकारीहरु दलाल र सुशासनको कमजोरीले डुबिरहेको बताए । “कृषि सहकारी संस्था ब्याज खाने संस्था होइन, यसले कृषिमा लगानी गर्ने र कृषकलाई सुबिधा दिने हो ।” मन्त्री चौधरीले भने “वार्षिक प्रतिवेदन हेर्दा यस सहकारीले दिनप्रतिदिन प्रगति गरिरहेको छ ।”   

“यस संस्थाले गरेका गत वर्ष र अहिले को हिसाब किताब हेर्दा यस संस्थाको कारोबार हेर्दा प्रगति गरेको रहेको छ ।  यो संस्था शेयर सदस्यहरुको संस्था हो ।” मन्त्री चौधरीले भने  “सदस्यहरुले यस संस्थाले वर्ष भरीमा के के काम ग¥यो भनेर तपाईंले बुझ्न आवश्यक रहेको छ ।”

धनगढी–७ का वडा अध्यक्ष मोती रानाथारुले दाइजो सहकारीका कारण किसानसँगै व्यवसायी पनि लाभान्वित रहेको बताए । कृषकलाई रासायनिक मल र कृषि यन्त्रहरु उपलब्ध गराएपछि कृषि कार्यमा सजिलो भएको उनले बताए । उनले कृषि योग्य जमिन घर घडेरीमा परिणत हुदै गएकोले कृषि योग्य जमिनलाई बाँचाइ राख्न आग्रह गरे ।

संस्थाका अध्यक्ष मान बहादुर रानाथारुको अध्यक्षतामा भएको कार्यक्रममा कृषि ज्ञान केन्द्र धनगढीका कामना कार्की, सहकारीका कानूनी सल्लाहकार कृष्ण प्रसाद सुुवेदी, शिक्षा समिति संयोजक मनराज यादव लगायतले मन्तव्य गरेका थिए । कार्यक्रम संचालन संस्थाका सचिव दिपक राज जोशीले गरेका थिए भने स्वागत मन्तव्य पुर्व अध्यक्ष चन्द्रकिरण चौधरीले गरेका थिए ।

कार्यक्रममा संस्थाका निवर्तमान अध्यक्ष चन्द्रकिरण राना, बचतकर्ता रामफुल राना, जोगिराम राना, असल ऋणी लाल बहादुर राना, आगनबारी मिडिया प्रा.लि. का  दिनेश राना सम्मानित भएका हुन ।