अवैध सुन र हुण्डी कारोवारको आरोपमा कैलालीका पाण्डेय काठमाण्डौमा पक्राउ

काठमाण्डौं । अवैध सुन र हुन्डी कारोबार गरेको आरोपमा न्युरोडका सुनचाँदी व्यवसायीलाई प्रहरीले पक्राउ गरेको छ । न्युरोडस्थित ओम पर्ल गोल्ड प्रालि र कैलाश ज्वेलर्स प्रालिका सञ्चालक पदमप्रसाद पाण्डे पक्राउ परेका हुन् । उनी कैलालीको लम्की चुहा नगरपालिका–७ का स्थायी बासिन्दा हुन् ।

काठमाडौं उपत्यका अपराध अनुसन्धान कार्यालयको टोलीले पाण्डेसँग ७ किलो १८५ दशमलव ३३५ ग्राम सुन तथा सुनका गरगहना, चार हजार एक सय अमेरिकी डलर, ३९ लाख ५० हजार नेपाली रकम, मोबाइल र विभिन्न कागजातहरू पनि बरामद गरेको छ ।

उपत्यका अपराध अनुसन्धान कार्यालयका प्रवक्ता प्रहरी उपरीक्षक (एसपी) रविन्द्र रेग्मीका अनुसार पाण्डेमाथि काठमाडौंका विभिन्न ठाउँमा बिल–बिजक बीनाको सुनका गरगहनाहरू बिक्री वितरण गरेको र गैरकानुनी रूपमा हुण्डी मार्फत वित्तीय कारोबार गरेको आरोप छ ।

यस्तै उनीमाथि तस्करीको सुन गालेर विक्री गर्ने गरेको आरोप छ । उनको पसललाई अवैध सुन गाल्न प्रयोग गरिएको कारखाना नै देखिएको प्रहरीको दाबी छ ।

हामीकहाँ विश्वस्त सूचना आएपछि छापा मारेका हौं । छापा हान्दा सूचना अनुसारका केही सबुत प्रमाण पनि फेला परेका छन्,’ एसपी रेग्मीले भने ।

उनका अनुसार पाण्डेलाई गैह्र कानुनी हुन्डी मार्फत वित्तीय कारोबार गरेको पाइएकाले नेपाल राष्ट्र बैंक ऐन अन्तर्गतको कसुरमा आवश्यक अनुसन्धान तथा कारबाहीको लागि जिल्ला प्रहरी परिसर काठमाडौं पठाएको छ ।

यस्तै बिल–विजक बीना सुनको गरगहना विक्री वितरण गर्ने गरेको र अमेरिकन डलर समेत बरामद भएकाले राजस्व छली सम्बन्धी कसुरमा थप अनुसन्धान गर्न राजस्व अनुसन्धान विभागलाई पत्राचार गरिएको पनि एसपी रेग्मीले जानकारी दिए ।

पछिल्लो समय त्रिभुवन अन्तर्राष्ट्रिय विमानस्थलबाट अवैध रुपमा ठूलो मात्रामा सुन भित्रिरहेका घटनाहरू बाहिरिएका थिए ।

साउन ३ गते मात्रै विमानस्थल भन्सार कार्यालयबाट जाँच पास भएर बाहिरिएको ६० किलो भन्दा बढी सुन राजस्व अनुसन्धान विभागको टोलीले बरामद गरेको थियो ।

त्यसअघि इलेक्ट्रिक सिगरेट ( भेप ) मा लुकाएर ल्याएको नौ किलो सुन प्रकरण पनि सार्वजनिक भएको थियो । उक्त घटनामा संलग्नताको आरोपमा नेकपा माओवादी केन्द्रका उपाध्यक्ष कृष्णबहादुर महराका छोरा राहुल लगायतका व्यक्ति पुर्पक्षका लागि थुनामा छन् ।

दुवै प्रकरणको नेपाल प्रहरीको केन्द्रीय अनुसन्धान ब्युरो ( सिआइबी ) को अनुसन्धानपछि काठमाडौं जिल्ला अदालतमा मुद्दा चलिरहेको छ ।

प्रहरी अनुसन्धानले यसरी तस्करहरूले अनेक बहाना बनाएर भित्र्याएको अवैध सुन नेपालमा गालेर गहना बनाइ भारत पठाउने गरेको प्रमाण प्रहरीले फेला पारेका छन् ।

सुन तस्करी सम्बन्धमा न्यायिक जाँचबुझ गर्न सरकारले जाँचबुझ आयोग ऐन, २०२६ को व्यवस्था बमोजिम पूर्व न्यायाधीश डिल्लीराम आचार्यको संयोजकत्वमा जाँचबुझ आयोग गठन गरेको छ ।

आयोगमा किशोरजंग कार्की, प्रेमराज जोशी र सहकुल थापा सदस्य छन् । आयोगले अहिले छानबिनलाई तीव्र पारेको छ ।