दुई दशक देखि पहिरोको उच्च जोखिममा बाजुराका दुई बस्ती

धनगढी

बाजुराको बुढीगंगा नगरपालिका अन्तर्गत बजेडी र लडाङ गाउँ झण्डै २ दशक देखि पहिरोको उच्च जोखिममा रहेका  छन । गाउँको चारैतिरबाट पहिरो आएको २ दशक बितिसक्यो अझै पहिरो नियन्त्रण हुन सकेको छैन । गाउँको चारै तिरबाट पहिरो आएपछि लडाङको सिंगो बस्ती नै पहिरोको उच्च जोखिममा रहेको छ ।

 दुई दशक देखि पहिरोको उच्च जोखिममा रहेको २ वटा बस्तीको चारैतिरबाट यस बर्ष पनि एक साता यताको अबिरल बर्षा संगै पहिरो बग्न थालेको छ । बजेडी गाउँको चारैतिरबाट पहिरो बग्न थालेपछी गाउँ नै जोखिममा रहेको स्थानीय दयाराम जोशीले बताए । उनले भने –‘२० बर्ष भयो पहिरो आउन शुरु भएको अझै रोकिएको छैन हरेक बर्ष बढ्दै गएको छ ।’ बजेडीका १ सय ३७ घरधुरी र लडाङका १ सय १० घरधुरी पहिरोको जोखिममा रहेका छन् । जस मध्ये बजेडीका २० घरधुरीहरु विस्थापित भैसकेका छन् । बिस्थापित भएकाहरु हाल छिमेकीको घरमा ओत लागेर बसेका छन् ।

 बुढीगंगा नगरपालिकाका प्रमुख दिपक विक्रम शाहले प्रमुख जिल्ला अधिकारीलाई बस्ती सार्न केन्द्रमा पहल गर्नकालागि पटक पटक अनुरोध गर्दा समेत वास्ता नगरेको बताए । ‘नगरपालिकाले उनीहरुलाई राहत दिने हो’ उनले भने–‘त्यो भन्दा बढी के नै सहयोग गर्न सक्छ ।’ २०५० साल पहिले देखि पहिरो बग्न थालेको बजेडी गाउँमा यो वर्ष झनै जोखिम देखिएको छ ।

 दर्जनौ परिवार विस्थापित बनेपनि बीचमा केही वर्ष पहिरो सामान्य रोकिएको थियो । यो वर्ष भने फेरि सिंगो गाउँ नै विस्थापितको खतरा बढेको नगर प्रमुख शाहको भनाई छ ।