सुरेन्द्र सिंहको हत्यामा संलग्न सुवर्ण श्रेष्ठ पक्राउ

धनगढी धनगढी–१ का सुरेन्द्र सिंहको हत्यामा संलग्न रहेको आरोप लागेका सुर्वण श्रेष्ठ पक्राउ परेका छन् । उनलाई प्रहरीले घटना घटेको साढे ८ बर्षपछि पक्राउ गरेको हो ।

        जिल्ला प्रहरी कार्यालय कैलालीले धनगढी उपमहानगरपालिका वडा नम्बर १ का ४१ वर्षीय सुरेन्द्र सिहको हत्यामा संलग्न वडा नम्बर ८ का सुवर्ण श्रेष्ठलाई पक्राउ गरेको जनाएको छ । श्रेष्ठ घटना भएदेखि नै फरार रहेका थिए । शनिबार धनगढी उपमहागरपालिका वडा नम्बर ९ मा लुकेको अवस्थामा भेटिएका श्रेष्ठलाई पक्राउ गरि आज जिल्ला अदालत कैलालीमा बुझाईएको जिल्ला प्रहरी कार्यालयका प्रहरी नायव उपरिक्षक प्रतिक बिष्टले बताए ।

        धनगढी गाउँमा २०६८ सालको मंसिरमा लागेको मेलामा कुटपिटबाट घाईते भएका सिंहको उपचारका क्रममा मृत्यु भएको थियो । जिल्ला प्रहरी कार्यालयका प्रवक्ता प्रहरी नायब उपरिक्षक विष्टका अनुसार कुटपिट गरी घाईते बनाउने मध्येका श्रेष्ठलाई आठ वर्ष ७ महिना पछि पक्राउ गरिएको हो ।

     सिंहको कुटपिटपछि दायर भएको कर्तव्य ज्यान मुद्दामा श्रेष्ठ सहितका दुई जनालाई प्रतिवादी बनाएको थियो । कैलाली जिल्ला अदालतले दुवैजनालाई जन्म कैदको सजाय सुनाएको थियो ।