लायन्स क्लब अफ धनगढी समृद्धिद्धारा दृष्टि फाउण्डेशनलाई स्कुटी हस्तान्तरण

धनगढी     

  लायन्स क्लब अफ धनगढी समृद्धिले दृष्टि फाउण्डेशन धनगढीलाई सोमबार एक स्कुटी हस्तान्तरण गरेको छ । धनगढीमा आयोजित कार्यक्रममा लायन्स क्लब अफ नेपाल ३२५ बी २ का द्धितीय भाइस  डिष्ट्रिक्ट गभर्नर सिबी चन्दले दृष्टि फाउण्डेशसनकी संचालिका कल्पना भट्टलाई स्कुटीको चाबी हस्तान्तरण गरेका हुन् ।

  गत चैत महिनामा फाउण्डेशनमा राखिरहेको स्कुटी अज्ञात समुहले राति जलाएको थियो । भट्टले उक्त स्कुटीमा अनाथ र बालबालिकाहरुलाई फाउण्डेशनमा ल्याउने, बिरामी भएमा अस्पताल लैजाने गरेकी थिइन् ।

  ‘राम्रो काम गर्दा सहयोग पाइने रहेछ भन्ने आज प्रमाणित भएको छ ।’ चाबी बुझेपछि  भट्टले भनिन् ‘स्कुटी हराएपछि धेरै अफ्ठेरो भएको थियो ।’

   स्कुटरलाई स्कुटरको रुपमा नभएर बिरामीहरु अस्पताल पुरयाउन एम्बुलेन्सको रुपमा प्रयोग गरेको उल्लेख गर्दै भट्टले भनिन् ‘स्कुटी पाएपछि मानवीय सेवामा लाग्न थप बल मिलेको छ ।’

  साउन पहिलो साता आफ्नो जन्मोत्सवको दिन सहयोग गर्न  दृष्टि फाउण्डेशन पुग्दा स्कुटी चोरी भएर परेको अफ्ठेरो थाहा पाएपछि सहयोग जुटाएर स्कुटी खरिद गरि हस्तान्तरण गरिएको लायन्स क्लब अप धनगढी समृद्धिकी अध्यक्ष गोमा अधिकारीले बताइन् । ‘स्कुटी नभएर साह्रै अफ्ठेरो भैरहेको थाहा पाएँ ।‘ अध्यक्ष अधिकारीले भनिन् ‘त्यसपछि क्लबमा सल्लाह गरेर स्कुटी सहयोग गर्ने निर्णय गरिएको हो ।‘  

  अध्यक्ष अधिकारीका अनुसार क्लबको सदस्य र अन्य गरि ३३ जनाबाट संकलित सहयोग रकम १ लाख ९३ हजारमा स्कुटी खरिद गरिएको हो ।