अछाममा भालुको आक्रमणबाट तीन जना घाइते

धनगढी

    अछाममा भालुको आक्रमणबाट तीन जना घाइते भएका  छन् । शुक्रबार रामारोशन गाउँपालिका –६ भाटाकाटीया स्थित तुर्सानी समुदायिक वनमा भालुले आक्रमण गर्दा भाटाकाटियाका ३० वर्षीय दानबहादुर साउद र ३८ वर्षीय तुल साउद घाइते भएका छन् ।

   दिउसो घाँस दाउरा काट्ने क्रममा भएको आक्रमणबाट घाईते भएका उनीहरुको अबस्था गम्भीर रहेको जिल्ला प्रहरी कार्यालय अछामले जनाएको छ । घाइते दुवैलाई प्रहरी चौकी सान्तडाबाट गएको टोलीले उद्धार गरी बयालपाटा अस्पताल पठाएको जिल्ला प्रहरी कार्यालय अछामका सूचना अधिकारी प्रहरी निरीक्षक रमेश दत्त अवस्थीले बताए ।

  यस्तै शुक्रबार नै रामारोशन गाउँपालिका –५ छडिखोलाको जंगलमा घाँस, दाउरा काटने क्रममा भालुले ५५ वर्षीय भैरे बटलामाथि पनि आक्रमण गरेको छ । उनको समेत प्रहरी चौकी सान्तडाबाट गएको टोलीले उद्धार गरी बयलपाटा अस्पताल पठाएको सूचना अधिकारी अवस्थीले बताए । उनको अवस्था पनि गम्भीर रहेको प्रहरीले जनाएको छ ।