शुक्रबार देशभर थपिएका संक्रमित मध्य आधा सुदूरपश्चिमका

शुक्रबार देशभर थपिएका संक्रमित मध्य आधा सुदूरपश्चिमका

धनगढी

    केही दिन यता सुदूरपश्चिममा फेरी संक्रमितको संख्या बढ्न थालेको छ । शुक्रबार देशभर २ सय २४ जनामा कोरोना संक्रमण पुष्टि हुँदा सुदूरपश्चिममा  मात्र त्यसको अधा भन्दा अझै एक बढी १ सय १३ जनामा संक्रमण देखियो ।

   स्वास्थ्य तथा जनसंख्या मन्त्रालयका अनुसार देशभरका प्रयोगशालामा १० हजार ७ सय ८६ नमुना परीक्षण गर्दा २ सय २४ जनामा संक्रमण पुष्टि भएको हो । यो नेपालमा २४ घण्टामा गरिएको अहिलेसम्मकै सबैभन्दा धेरै परीक्षण हो ।

    यस अघिका परिक्षणमा पनि एक दिन देशभर देखिने संक्रमित र सुदूरपश्चिममा देखिने संक्रमितको संख्या बराबर जस्तै हुने गरेको थियो । सुदूरपश्चिममा सबैभन्दा बढी संक्रमित असार १९ गते देखिएका थिए । त्यस दिन देशभर साढे सात सय संक्रमित देखिदा सुदूरपश्चिम प्रदेशमा मात्र  ४ सय ८९ जनामा कोरोना पुष्टि भएको थियो ।

   असार तेस्रो साता देखि साउनको पहिलो साता सम्म दैनिक देखिने संक्रमितको संख्यामा कमी आएको सुदूरपश्चिम प्रदेशमा साउनको दोस्रो साता देखि  फेरी बढेको छ । बिहिवार संक्रमित पुष्टि संख्या केही कम देखिए पनि मंगलबार र बुधबार भने बढेको  छ । शुक्रबार आएर फेरी संक्रमितको संख्या ह्वात्तै बढेर १ सय १३ पुगेको छ ।

 शुक्रबार धनगढीको सेती प्रादेशिक अस्पतालको प्रयोगशालामा २६ जना, डडेल्धुरा प्रयोगशालामा १३ जना राष्ट्रिय जनस्वास्थ्य प्रयोगशाला टेकूमा ४० जना र धुलिखेल अस्पतालमा ३४ जना गरि १ सय १३ जनामा कोरोना पुष्टि भएको स्वास्थ्य तथा जनसंख्या मन्त्रालयले जनाएको छ ।

   राष्ट्रिय जनस्वास्थ्य प्रयोगशालामा भएको परीक्षणमा बझाङका २५ र कैलालीका १५ गरी ४० जनामा संक्रमण पुष्टि भएको मन्त्रालयले जनाएको छ । मन्त्रालयका अनुसार धुलीखेल अस्पतालमा भएको परीक्षणमा कञ्चनपुरका १८ र दार्चुलाका १६ जनामा पनि कोरोना देखिएको छ भने डडेल्धुरा अस्पतालमा भएको परीक्षणमा बैतडीका १० र डोटीका तीन जनामा संक्रमण पुष्टि भएको छ ।

शुक्रबार नै धनगढी स्थित सेती प्रादेशीक अस्पतालको प्रयोगशालामा कैलालीका २३, बझाङका दुई र कञ्चनपुरका एक गरी २६ जनामा संक्रमण पुष्टि भएको छ । कैलालीका २३ जना मध्ये धनगढीका मात्रै १६ जना छन् ।