धनगढीको शिवपुरी उत्तररामेश्वर धाममा लागेको महायज्ञमा ३५ लाख बढी रुपैयाँ संकलन

धनगढी । धनगढी उपमहानगरपालिका वडा नम्बर ४ मा रहेको शिवपुरी उत्तररामेश्वर ज्योतिर्लिङ्ग धाममा लागेको ऐतिहासिक हवनात्मक रुद्रयाग, शनि संकटा तथा पद्मा पुराण अनुष्ठान सङ्गीतमय श्रीमद्भागवत कथा प्रवचन एवम् विश्व कल्याण शृङ्गारिक महाआरती महायज्ञको आयव्यय सार्वजनिक गरेको छ ।

मंगलबार धाम विकास समितिले पत्रकार सम्मेलन गरेर आयव्यय सार्वजनिक गरेको हो । यही फागुन २ गते देखि १५ गते सम्म आयोजना भएको महायज्ञमा ३५ लाख बढी रुपैयाँ संकलन भएको छ ।

समितिका अनुसार ३५ लाख १३ हजार तीन सय एक रुपैयाँ संकलन भएको समितिले जनाएको छ । महायज्ञ व्यवस्थापन समितिका संयोजक तिलक बोहराले दिएको जानकारी अनुसार २७ लाख २१ हजार दुई सय ९८ रुपैयाँ खर्च भएको छ ।

महायज्ञ आयोजना गर्दा उक्त रकम खर्च भएको हो । सात लाख ९२ हजार तीन रुपैयाँ बचत भएको पत्रकार सम्मेलनमा बोहराले जानकारी दिए । महायज्ञ सञ्चालन गर्दा सबै भन्दा बढी टेन्ट व्यवस्थापन र बाह्मणलाई दक्षिणमा खर्च भएको छ ।

टेन्ट हाउस व्यवस्थापनमा सात लाख ७५ हजार खर्च भएको छ, भने बाह्मणलाई दक्षिणामा सात लाख १८ हजार छ सय ५० रुपैयाँ खर्च भएको पत्रकार सम्मेलनमा जानकारी दिएको हो ।

शिवपुरी धामलाई धार्मिक पर्यटकीय स्थलको रूपमा विकास गर्नका लागि मन्दिर व्यवस्थापन समितिले हरेक वर्ष फागुनमा महायज्ञ सञ्चालन गर्ने गरेको छ । पत्रकार सम्मेलनमा महायज्ञ सञ्चालन गर्दा सक्रिय व्यक्तिहरूलाई सम्मान समेत गरेको थियो ।