दार्चुलामा पहिरोले ११ परिवार विस्थापित

धनगढी

दार्चुलामा अबिरल बर्षा संगै खसेको पहिरोका कारण ११ परिवार बिस्थापित भएका छन् ।

   आज बिहानै खसेको पहिरोले दार्चुलाको महाकाली नगरपालिका–२ मा ११ परिवार बिस्थापित भएका हुन् ।  आइतबार बिहान करिब साढे ६ बजेतिर मुल्ला मैखोली सडक नजिकैबाट खसेको पहिरोका कारण ११ परिवार बिस्थापित भएको महाकाली नगरपालिका वडा नम्बर २ का वडाध्यक्ष गौरसिंह साहुले बताए ।

  सडक नजिकैबाट खसेको पहिरोले चारवटा घर पुरिएका   छन । वडा नम्बर २ का कालु भुल, मनि भुल, करे भुल र ललित पार्कीको घर पहिरोले पुरिएको वडाध्यक्ष साहुले जानकारी दिए ।  उनका अनुसार कालु भुलको पूरै घर पहिरोले पुरिएको छ भने घरभित्र रहेको अन्नपात, लुगा कपडा तथा चौपाया सबै पहिरोले पुरिएका छन् ।

 अन्य तीन जना मनि भुल, करे भुल र ललित पार्कीको घर पनि पहिरोले पूर्ण क्षति भएको छ । घरमा पहिरोले पुरेपछि  उनीहरु बिचल्लीमा परेका छन् ।

त्यसैगरी सोही ठाउँका अन्य ७ घर पनि पहिरोको उच्च जोखिममा परेका छन् । रुबी पार्की, अम्मरा पार्की, मानमति पार्की, हरकसिंह साहु, पारस साहु, शेरराम पार्की र जनक पार्कीको घर पहिरोको उच्च जोखिममा रहेको वडाध्यक्ष साहुले जानकारी दिए  ।