कोरोना बढेपछि बर्दियामा ५ दिन निषेधाज्ञाको घोषणा

गुलरिया, २४ साउन

  जिल्लामा कोरोना संक्रमितको संख्या बढ्दै गएपछि जिल्ला कोभिड–१९ संकट व्यवस्थापन केन्द्र बर्दियाले आउँदो साउन २५ गतेदेखि ५ दिनका लागि निषेधाज्ञाको घोषणा गरेको छ ।

   केन्द्रका संयोजक एवम बर्दियाका प्रमुख जिल्ला अधिकारी लीलाधर अधिकारीको संयोजकत्वमा बसेको आपत्कालिन बैठकले साउन २९ गतेसम्म  जिल्लाभर पूर्ण रुपले निषेधाज्ञा घोषणा गर्ने निर्णय गरेको हो ।

    बिहान ६ बजेदेखि साउन २९ गते मध्यराति १२ बजेसम्म ५ दिनका लागि निषेधाज्ञा  गर्ने निर्णय गरेको छ ।

 निषेधाज्ञाको अवधिमा औषधी उपचार र खाद्यबस्तुको खरिद बाहेकका काममा ननिस्कन जिल्ला प्रशासन कार्यालय बर्दियाले बिज्ञप्ति प्रकाशन गरेर आग्रह गरेको छ । लकडाउनको अवधिमा अनुमतिप्राप्त सवारी साधन, झण्डावाद सवारी साधन, कुटनीतिक प्लेटका सवार साधन, मालबाहक सवारी साधन, स्वास्थ्ष्कर्मी र सुरक्षाकर्मीले प्रयोग  गर्ने बाहेकका सवारी साधन संचालनमा पुर्ण रोक लगाउने निर्णय बैठकले गरेको छ । 

  भेरी अस्पताल नेपालगन्जको कोरोना प्रयोगशालामा गरिएको परीक्षणमा शुक्रबार बर्दियाका १३ जनामा कोरोना संक्रमण पुष्टि भएको थियो ।   योसँगै बर्दियामा अहिलेसम्म २ सय ४८ जनामा कोरोना पुष्टि भएको छ ।