कैलाली कारागारको घटनाको निष्पक्ष छानबीन गर्न संसदिय समितिको  सरकारलाई निर्देशन

काठमाण्डौं । प्रतिनिधि सभा अन्तर्गतको कानून, न्याय तथा मानव अधिकार समितिले कैलाली कारागारमा भएको घटनाको निष्पक्ष छानबिन गरी दोषी उपर कारबाही गर्न सरकारलाई निर्देशन दिएको छ । समितिको बुधबार बसेको बैठकले कैलाली कारागामा साउन २३ गते भएको घटनाको छानबीन गरि  पीडितलाई नियमानुसार क्षतिपूर्ति उपलब्ध गराउने आवश्यक प्रबन्ध गर्न पनि प्रधानमन्त्री तथा मन्त्रिपरिषद् कार्यालय, गृह मन्त्रालय र कानून, न्याय तथा संसदीय मामिला मन्त्रालयलाई निर्देशन दिएको हो ।

साउन २३ गते कैलाली कारागारमा कैदीबन्दबीच झडप हुदा धनगढी ४ का भरत चौधरीको मृत्यु भएको थियो भने ४९ जना घाइते भएका थिए । घाइते १ जनालाई उपचारका लागि काठमाण्डौ) लगिएको छ ।

समितिले भनेको छ, “देशका विभिन्न जिल्लामा अवस्थित कारागारहरूमा समय समयमा हुने गरेका यस्ता झडप तथा कुटपिटका घटना दोहोरिन नदिन कारागार प्रशासनलाई थप जिम्मेवार बनाउने र कैदीबन्दी मध्येबाट नेतृत्व छनोट गरी कारागारभित्रको आन्तरिक व्यवस्थापनको जिम्मेवारी दिने प्रावधानको पुनरावलोकन गर्न समितिले सरकारलाई निर्देशन गर्दछ ।”

अपराधको प्रकृति, बन्दीको सङ्ख्या र स्वभावअनुसार फरक फरक ब्लक वा कारागारमा राख्ने, कैदीबन्दीलाई श्रम र उत्पादनसँग जोड्ने लगायत विषय सहितको आवश्यक रणनीति तय गरी प्रभावकारी कार्यान्वयन गर्न पनि समितिले निर्देशन दिएको छ ।