विपीन जोशीको महकाली किनारमा अन्त्येष्टि, शवयात्रामा हजारौंको सहभागिता

प्यालेस्टिनी लडाकु समूह हमासद्वारा इजरायलबाट बन्धक बनाइएका बेला ज्यान गुमाएका कञ्चनपुरका विपिन जोशीको  आज (मंगलबार) कञ्चनपुरस्थित महाकाली नदी किनारमा अन्त्येष्टि गरिएको छ ।

हजारौंको सहभागितामा भएको शवयात्रापछि महाकालीको भुजेलाघाटमा बिपीनको राष्ट्रिय सम्मानसहित अन्त्येष्टि गरिएको हो । शवयात्रामा नेपालका लागि इजरायली राजदूत समेत सहभागी थिए ।

विपिन जोशीको सम्मानमा सशस्त्र प्रहरीले सलामी अर्पण गरेको थियो ।

इजरायलबाट सोमबार काठमाडौं ल्याइएको विपिनको शव नेपाली सेनाले साँझ धनगढी विमानस्थलसम्म लगेको थियो । त्यहाँबाट राति नै भीमदत्त ३ स्थित घरमा लगिएको थियो ।

दुई वर्षअघि सुदूरपश्चिम विश्वविद्यालयको ‘लर्न एण्ड अर्न’ कार्यक्रम अन्तर्गत इजरायल पुगेका विपिन इजरायल पुगेको एक महिनामै हमासको आक्रमणमा परेका थिए । हमास लडाकुहरु गाजा क्षेत्रबाट इजरायलमा प्रवेश गरी सन् २०२३ को अक्टुबर ७ मा आक्रमण गरेका थिए ।

उक्त आक्रमणमा परेर सुदूरपश्चिम विश्वविद्यालयका १० विद्यार्थीको मृत्यु भएको थियो भने विपिनलाई बन्धक बनाइएको थियो ।