सुदुरपश्चिममै निर्माण गरिएको ऋतु लघु बाल चलचित्रका कलाकार सम्मानित

धनगढी ।  ए. एस. उडान  फिल्म प्रोडक्सन धनगढी कैलालीले निर्माण गरेको ऋतु बाल लघु राष्ट्रिय चलचित्रका कलाकारहरुलाई आइतबार धनगढीमा सम्मानित गरिएको छ ।  प्रतिनिधि सभाका सदस्य डिल्लीराज पन्त र सुदुरपश्चिम प्रदेश सभाका सदस्य धर्मराज पाठकले कलाकारहरुलाई प्रशंसापत्र प्रदान गरेका हुन् ।

राष्ट्रिय चलचित्र बिकास बोर्डबाट इजाजत लिएर ए. एस. उडान  फिल्म प्रोडक्सनले निर्माण गरेको ऋतु बाल लघु चलचित्रको निर्देशन र कथा लेखन  अम्बिका प्रसाद आचार्यको गरेका हुन् ।  शैक्षिक  तथा सन्देशमुलक उक्त बाल लघु चलचित्रको कथा सम्पादक स्तुति आचार्य, क्यामेरामेन अनिल चौधरी  तथा प्राविधिक लाइट्स्मेन योगेश अवस्थी रहेका छन् ।

सुदुरपश्चिममा नै छायांकन गरिएको ऋतु  बाल लघु चलचित्रमा कलाकारहरु सोनिया बम,  सुस्मिता  कुँवर खड्का, सबिना कँडेल (बलायर),  सुशील प्रकाश जोशी, ज्योति उप्रेती,  जवानी चौधरी, अभिषेक थापा, अमृता कार्कीको अभिनय रहेको छ ।

त्यस्तै,  नेपाली चलचित्रका चकलेटी नायक तथा मोडेल श्रीदेव भट्टराई र कार्यक्रम व्यवस्थापक संघ नेपालका अध्यक्ष राजेन्द्र लुइटेललाई खादा तथा दोसल्ला ओढाएर सम्मान गरिएको थियो ।

सो अवसरमा  प्रतिनिधि  सभा सदस्य डिल्लीराज पन्तले आचार्यले बिगतदेखि नै कलाकारितामा पुरयाएको योगदान उच्च रहेको बताउँदै अचार्यले अभिनय गरेको अर्पण चलचित्रको आफुले हेरेको  सम्झना अझै रहेको बताए । आचार्यले सो चलचित्रमा गरेको सशक्त  अभिनय आफ्नो मानसपटलमा आजसम्म ताजै रहेको उनले बताए ।

आचार्य आज कलाकार उत्पादनका लागि ब्यानर बनाएर लाग्नु यस क्षेत्रको लागि निकै प्रशंसनिय  कार्य भएको पन्तले बताए  ।

सुदुरपश्चिम प्रदेश सभा सदस्य  धर्मराज पाठकले सुदुरपश्चिमको पहिलो नायक अम्बिका प्रसाद जीले आफुलाई  नायकदेखि  ऋतु बाल लघु चलचित्रबाट निर्माता र निर्देशकका रुपमा पनि आफुलाई  स्थापित गरेको बताए ।  

नायक श्रीदेव भट्टराईले सुदुरपश्चिम कला क्षेत्रमा धनी भएको बताउँदै यहा फिल्म  निर्माणका लागि निकै आकर्षक क्षेत्रहरु रहेको बताए । सुदुरपश्चिममा आफुले तीन चलिचित्रमा अभिनय गरिसकेको भट्टराईले बताए ।  

निर्माता तथा निर्देक आचार्यले सुदुरपश्चिममा नै कलाकार उत्पादन गर्ने  कलेज तथा इन्स्टिच्युट स्थापना गर्ने,  अभिनय प्रशिक्षण सिकाउने इन्स्टिच्युट स्थापना गर्ने र सुदुरपश्चिमका सबै भाषाभाषीमा चलचित्र  निर्माण गर्ने   लक्ष्य रहेको बताए ।

ए. एस. उडान फिल्म प्रोडक्सनका निर्देशक अम्बिका प्रसाद आचार्यको अध्यक्षतामा भएको कार्यक्रमको संचालन सचिव गुणाकर पनेरुले गरेका थिए ।

त्यस्तै आइतबार नै ए एस उडान प्रोडक्सनको कार्यालयका पनि उद्घाटन गरिएको छ ।  प्रतिनिधि सभाका सदस्य डिल्लीराज पन्त, सुदुरपश्चिम प्रदेश सभाका सदस्य धर्मराज पाठक, नायक भट्टराई र लुइटेलले कार्यालयको उद्घाटन गरेका हुन् ।