डोटीमा बस दुर्घटना तीन जनाको मृत्यु

धनगढी

 कैलालीबाट अछाम जाँदै गरेको बस डोटीमा दुर्घटना भएको  छ । डोटीको पूर्वीचौकी गाउँपालिका–१ फुलौटमा बस दुर्घटना हुँदा तीन जनाको घटनास्थलमै मृत्यु भएको छ भने २९ जना घाइते भएका छन् ।

  जिल्ला प्रहरी कार्यालय डोटीका प्रहरी निरीक्षक कर्णबहादुर बोहराका अनुसार ना ६ ख २५२९ नम्बरको बस दुर्घटनामा परेको हो । उनका अनुसार दुर्घटनामा परी मृत्यु हुनेको सनाखत हुन सकेको छैन ।

 नेपाली सेना, नेपाल प्रहरी तथा सशस्त्र प्रहरीको टोलीले घाइतेहरुको अहिले उद्धार गरिरहेको जिल्ला प्रहरी कार्यालय डोटीले जनाएको छ ।

 घाइतेहरुलाई उपचारका लागि जिल्ला अस्पताल डोटी ल्याउने तयारी भइरहेको जिल्ला प्रहरी कार्यालय डोटीका प्रहरी प्रमुख  प्रहरी उपरीक्षक जनकराज पाण्डेले बताए । उनले घाईतेको उद्धार गरिरहेको र संख्या धेरै रहेको बताए । बस सडकबाट ३० मिटर तल खसेको छ ।