सुदूरपश्चिममा बुधबार थपिए ४४ जना कोरोना संक्रमित

धनगढी

     बुधवार सुदूरपश्चिम प्रदेशका तीन वटा प्रयोगशालामा गरिएको परिक्षणमा थप ४४ जनामा कोरोना संक्रमण पुष्टि भएको छ । बुधबारको परिक्षणमा कैलालीका ३२ सहित थप ४४ जनामा कोरोना संक्रमण पुष्टि भएको छ ।

   सेती प्रादेशिक अस्पताल, डडेल्धुरा अस्पताल र डोटी जिल्ला अस्पतालको प्रयोगशालामा भएको परीक्षणमा गरि थप ४४ जनामा संक्रमण पुष्टि भएको हो ।

   सेतीमा पछिल्लो २४ घण्टामा नौँ सय ८१ जनाको कोरोना परीक्षण भएकोमा २५ जनामा संक्रमण पुष्टि भएको छ । अस्पतालले जारी गरेको बिज्ञप्ती अनुसार कैलालीको धनगढी उपमहानगरपालिकाका  १५, टीकापुरका तीन र एक जना स्थानीय तह नखुलेका महिलालाई संक्रमण पुष्टि भएको     छ ।

 यस्तै कञ्चनपुरको भीमदत्त नगरपालिकाका तीन, कृष्णपुरका दुई र बेल्डाँडीका एक जनामा संक्रमण पुष्टि भएको बिज्ञप्तीमा उल्लेख छ । बुधबार नै डडेल्धुरा अस्पतालको प्रयोगशालामा ६ सय ५० जनाको कोरोना परीक्षण भएकोमा १७ जनामा संक्रमण पुष्टि भएको छ । प्रयोगशाला इन्चार्ज ईश्वरी प्रशाद भूषालका अनुसार कैलालीका १३, कञ्चनपुर र डडेल्धुराका दुई÷दुई जनामा संक्रमण पुष्टि भएको हो ।

   यस्तै बुधबार नै डोटी जिल्ला अस्पतालको प्रयोगशालामा भएको परीक्षणमा दुई जनामा संक्रमण पुष्टि भएको छ । ९१ जनाको कोरोना परीक्षण भएकोमा दुई जनामा संक्रमण पुष्टि भएको अस्पतालले जनाएको छ । अस्पतालका प्रयोगशाला इन्चार्ज शौरभ श्रेष्ठका अनुसार संक्रमण पुष्टि भएका दुवै जना अछामका हुन ।