बाजुरामा घर भत्किदा पाँच जना घाइते

धनगढी

  बाजुरा जिल्लाको बुढीगंगा नगरपालिका ६ फालासैनमा घर भत्किदा एकै घरका पाँच जना घाइते भएका छन् ।

 बिहीबार राति एकाएक घर भत्किए पछि पाँच जना घाइते भएको स्थानीय भरत बुढाले बताए । उनका अनुसार स्थानीय डिल्ली थापाको घर भत्किदा पाँच जना घाइते भएका हुन् ।

   घाइते हुनेमा १७ वर्षीया उर्मिला थापा,३२ वर्षीया मन्देवी थापा,१७ वर्षीया समिक्षा थापा,१९ वर्षीया जाल्पा थापा र ८ वर्षीय समीर थापा रहेको बुढाले बताए  । राती सुती रहेको अवस्थामा घर भत्किएको   थियो । घाइते भएकाहरुको फालासैनमा रहेको बडीमालिका पोलिकिलिनमा उपचारपछि घर फर्काइएको छ ।

  घर भत्किए लगत्तै स्थानीयले थाहा पाएपछि त्यहाँ रहेका पाँचै  जनालाई उद्धार गरेका कारण मानवीय क्षती नभएपनि भौतिक क्षती भने धेरै भएको छ । अहिले उनीहरु छिमेकीको घरमा बसेका छन् ।