डोटीमा भोली राती १२ बजेदेखि निषेधाज्ञा, कैलालीमा पनि थपिन सक्ने

धनगढी

  डोटीमा भदौ १४ गते आइतबार राती १२ बजेदेखि २१ गतेसम्म लागु हुने गरी निषेधाज्ञा लागु गर्ने निर्णय भएको  छ ।  जिल्लामा कोरोना महामारीको प्रभाव बढ्दै गएपछि संक्रमण रोकथाम, नियन्त्रण र उपचारमा सहजताका लागि जिल्ला संकट व्यवस्थापन केन्द्रको शुक्रबार बसेको बैठकले एक साता निषेधाज्ञा लागु गर्ने निर्णय गरेको हो ।

   डोटीका प्रमूख जिल्ला अधिकारी भीमप्रसाद भट्टराईले संकट व्यवस्थापन केन्द्रको बैठकले निर्णय गरिसकेको र आईतबार आदेश जारी गरिने बताए । निषेधाज्ञाका क्रममा अत्यावश्यकीय सेवा बाहेक अन्य सेवाहरु पूर्ण रुपमा बन्द हुने उनले बताए ।

 यता सुदूरपश्चिम प्रदेशको राजधानी रहेको कैलालीमा भदौ ४ गते राती देखि देखि लागु गरिएको निषेधाज्ञा आईतबार अर्थात भोली सकिदैछ  । यसअघि प्रमुख जिल्ला अधिकारी यज्ञराज बोहराको आदेश अनुसार १४ गतेसम्म निषेधाज्ञा लगाइएकोमा आज निषेधाज्ञालाई जारी राख्ने वा नराख्ने विषयमा प्रमुख जिल्ला अधिकारीले नै निर्णय लिनेछन् ।

 शुक्रवार बसेको सुरक्षा समितिको बैठकले १९ गतेसम्म निषेधाज्ञा लम्ब्याउन सिफारिस गरेको छ । उक्त सिफारिसको आधारमा प्रमुख जिल्ला अधिकारी बोहराले निषेधाज्ञालाई लम्ब्याउने सम्भावना बढि रहेको छ । निषेधाज्ञाको अवधिमा अत्यावश्यक सेवा तथा वस्तु बाहेकका अन्य सबै प्रकारका उद्योग, व्यापार व्यवसाय सञ्चालन गर्न रोक लगाइएको    छ ।