धनगढी स्थित निसर्ग अस्पतालका दुई नर्स सहित चार जनामा संक्रमण

धनगढी

   धनगढीको निसर्ग अस्पतालका दुई जना नर्स सहित चार कर्मचारीमा कोरोना संक्रमण पुष्टि भएको छ ।

  सेती प्रादेशिक अस्पताल प्रयोगशालामा आईतबार गरिएको परीक्षणका क्रममा दुई जना स्टाफ नर्स र दुई जना सरसफाई कर्मचारीमा कोरोना पुष्टि भएको हो ।

  पुष्टि भएकामा धनगढी उपमहानगरपालिका वडा नम्बर २ की २३ वर्षीय र वडा नम्बर ८ की २५ वर्षीया गरी दुई स्टाफ नर्स रहेका छन् । यसैगरी वडा नम्बर २ की ३० र वडा नम्बर ७ की ३२ वर्षीया दुईजना सरसफाई कर्मचारीमा कोरोना पुष्टि भएको छ । केही दिन अघि मात्र निसर्ग अस्पतालको आईसीयुमा उपचाररत एक जना बिरामीमा कोरोना संक्रमण पुष्टि भएको थियो । 

     निसर्ग अस्पतालका संचालक कुबेर शाहीले आइतबार कोरोना संक्रमण देखिएका सबै कर्मचारी क्वारेन्टिाइनमा रहेको र संक्रमण देखिएपछि आइसोलेसनमा राखिएको बताए ।  “अस्पतालका बिरामीमा कोरोना देखिएपछि सबै कर्मचारी (१ शय ३५ जना ) को स्वाब परिक्षणका लागि पठायौं ।” शाहीले भने  “रिपोर्ट आउन बाकी रहेका कर्मचारीमा आज कोरोेना देखिएको हो । उनीहरु सबै आइसोलेसनमा छन् ।”

परिक्षणमा  कोरोना संक्रमण नदेखिएका थोरै कर्मचारीबाट मात्र अस्पताल संचालन भैरहेको संचालक शाहीले बताए ।