अछाममा कुटपिटबाट युवक मृत्यु प्रकरणमा ६ जना पक्राउ

धनगढी,

  जिल्ला प्रहरी कार्यालय अछामले २४ वर्षीय युवकको कुटपीटपछि मृत्यु भएको घटनामा संलग्न भएको आरोपमा ६ जनालाई पक्राउ गरेको छ ।

   प्रहरी निरीक्षक  रमेशदत्त अवस्थीका अनुसार कमलबजार नपा ६ हात्तीबाजका १९ वर्षका खेमराज शाही, २० वर्षका भूपेन्द्र शाही, २० वर्षका विनोद बहादुर शाही, २१ वर्षका अक्कल शाही, १९ वर्षका विनोद शाही र २५ वर्षका रमेश शाही पक्राउ परेका छन् ।

  उनले पक्राउ परेका माथि कर्तव्य ज्यान मुद्धा दर्ता गरि थप अनुसन्धान भईरहेको बताए । घटनामा संलग्न अन्य भने फरार रहेकाले खोजी कार्य जारी रहेको प्रहरी निरिक्षक अवस्थीले जानकारी दिए ।

  भदौं १६ गते मंगलसेन नगरपालिका वडा नम्बर १४ कालागाउँका २४ वर्षका सन्तोष भण्डारीलाई सोही ठाउँमा भुपेन्द्र शाही लगायत ७÷८ जनाको समुहले निर्धात कुटपिट गरेको थियो । घाइते भण्डारीको अछाम जिल्ला अस्पताल मंगलसेनमा उपचार हुन नसकेपछि थप उपचारका लागि नेपालगन्ज रेफर गरिएको थियो । भण्डारीलाई लिनको लागि सुर्खेतबाट माउन्टेन एयर हेलिकोप्टर मंगलसेन नपाको खुल्ला मैदानमा ल्याण्ड भएर भण्डारीलाई भित्र राख्ने क्रममा मृत्यु भएको थियो ।