एलपिएलको उपाधि हिमालयन ह्वाइट हाउसलाई

धनगढी

  धनगढीमा सम्पन्न पाँचौ संस्करणको लिटल फ्लावर प्रिमियर लिग (एलपिएल)को उपाधि काठमाण्डौंस्थित हिमालयन ह्वाइट हाउस स्कुलले जितेको छ ।

 शनिबार सम्पन्न फाइनल खेलमा साविक विजेता धनगढीको लिटल फ्लावर स्कुललाई ८० रनले पराजित गर्दै ह्वाइट हाउसले च्याम्पिएनको ट्रफि उचालेको हो । हिमालयन ह्वाइट हाउस गत बर्ष लिटल फ्लावर संग पराजित हुँदै दोश्रो स्थानमा सिमि तबनेको थियो ।

 धनगढीस्थित संघीय प्रहरी कार्यालयको खेल मैदानमा भएको फाइनल खेलमा टस जितेर पहिले ब्याटिङ गरेको ह्वाइट हाउसले निर्धारित २० ओभरमा ९ विकेट गुमाउँदै १ सय ६७ रन बनएको थियो । ह्वाइट हाउसका लागि गजेन्द्र बोहराले ७० र सतिश यादवले २९ रनको योगदान दिए । बलिङ तर्फ लिटल फ्लावरका राज कुमार शाहले ५ विकेट हात पारे ।

 १ सय ६८ रनको विजयी लक्ष्य पच्छ्याएको घरेलु टोली लिटल फ्लावर १७ ओभर ३ बलमा अल आउट हुँदै ८७ रनमै समेटिन पुग्यो । लिटल फ्लावरका लागि निशान्त बुढाऐरले १७ र पुष्करराज बडुले अविजित रहदै १४ रन बनाउनु बाहेक अन्य खेलाडीले खुलेर खेल्न सकेनन् । बलिङ तर्फ ह्वाइट हाउसका प्रतिश जिसीले ३ र स्वरुप श्रेष्ठले २ विकेट लिए । फाइनल खेलको म्यान अफ द म्याच ह्वाइट हाउसका गजेन्द्र बोहरा चुनिए ।

 उपाधिसंगै ह्वाइट हाउसले नगद १ लाख २० हजारसहित ट्रफी प्राप्त गरेको छ भने लिटल फ्लावरले ६० हजारमा चित्त बुझाएको छ ।

 प्रतियोगिताका सर्वोत्कृष्ट खेलाडी ह्वाइट हाउसका गजेन्द्र बोहरा भए । उनले नगद १० हजार पाए । यस्तै शारदा विद्या निकेतनका दिनेश ओड उत्कृष्ट ब्याट्सम्यान, ह्वाइट हाउसका सन्दिपजंग शाही उत्कृष्ट बलर र लिटल फ्लावरका सचिन भट्ट उदयमान खेलाडी घोषितभए । उनीहरुले जनही ५÷५ हजार प्राप्त गरे ।

 लिटल फ्लावर स्पोर्टस एण्ड इभेन्ट्सको आयोजनामा यही फागुन १५ गते देखी प्रतियोगिता सञ्चालन भएको थियो । प्रतियोगितामा देशभरका १६ टीमको सहभागिता रहेको थियो ।