फाइनल खेलमा नेपालका प्रशिक्षक अलमुताइरी माथी प्रतिबन्ध

धनगढी । साफ च्याम्पियनसिप फुटबलको फाइनल खेल नजिकिदाँ नेपालका मुख्य प्रशिक्षक अब्दुल्लाह अलमुताइरी माथी प्रतिबन्ध लगाइएको छ ।

साफको नियमावलीमा रातो कार्ड पाएमा मात्र अफिसियलले अर्को खेल गुमाउने उल्लेख भए पनि लिग चरणमा श्रीलंका र अन्तिम खेलमा बंगलादेशविरुद्ध पहेंलो कार्ड पाएका अलमुताइरीलाई आज भारतविरुद्ध हुने फाइनल खेलमा साफले प्रतिबन्ध लगाएको हो ।

नेपालका अन्जन विष्टले भने लगातार दुई खेलमा पहेंलो कार्ड पाएकाले उनले भारतविरुद्धको फाइनल खेल गुमाउने यसअघि नै पक्का थियो । भारतका प्रशिक्षक स्टिमाचले पनि बंगलादेशविरुद्धको खेलमा रातो कार्ड नै पाएकाले उनले पनि नेपालविरुद्ध हुने फाइनल खेल गुमाउने पक्का थियो । तर नेपालका प्रशिक्षक अल्मुतारीलाई समेत फाइनल खेलमा प्रतिबन्ध लगाइएको जानकारीसहितको पत्र साफले एन्फालाई दिएको छ ।

यसमा प्रशिक्षक अलमुताइरीले असन्तुष्टि जनाउँदै यो नियमविपरीत र अन्यायपूर्ण भएको प्रतिक्रिया दिएका छन् । उनले शनिबार बिहान भर्चुअल पत्रकार सम्मेलन गर्दै यो निर्णय भारतले खेल जितोस् भन्ने चाहनाबाट प्रेरित भएको बताएका छन् ।

उनले नेपालको नतिजाबाट खुसी नभएका र फाइनल पनि नेपालले नजितोस् भन्ने सडयन्त्र सहित प्रतिबन्ध लगाइएको बताए । अलमुताइरीले नेपाललाई साफ च्याम्पियनसिपको इतिहासमा पहिलो पटक फाइनलमा पुर्याएका थिए । बंगलादेशलाई बराबरीमा रोक्दै फाइनलमा पुगेर नेपालले इतिहास रचेको थियो ।

‘बंगलादेशविरुद्धको खेलपछि रेफ्रीमाथि आक्रमण भएको थियो, उनीहरुलाई के सजायँ भयो ?’ अलमुताइरीले प्रश्न गरेका छन्, ‘भारतीय प्रशिक्षक रिसायो भनेर नेपालको प्रशिक्षकलाई सजायँ दिने ? आफैंले बनाएको नियम नमान्ने हो भने नियम किन बनाउने ?’

उनले साफले अब्दुल्लाहलाई मात्रै निलम्बन गरेको नभइ  नेपालको मुख्य प्रशिक्षकलाई निलम्बन गरेको भन्दै आफु नभए पनि नेपाली टोलीले नतिजाको लागि प्रतिस्पर्धा गर्ने बताए । साफ च्याम्पियनसिपको बलियो टोली भारत र नेपालबीचको फाइनल खेल शनिबार राति पौने नौ बजे मालदिभ्सको राजधानी मालेमा हुँदैछ ।