नेपालद्वारा नामिबिया पराजीत

धनगढी । आइसीसी विश्वकप लिग–२ अन्तरगत मंगलबार देखि काठमाण्डौंमा सुरु भएको नेपाल र नामिबिया विचको त्रिकोणत्मक एकदिवसीय क्रिकेट प्रतियोगिता अन्तरगत पहिलो खेलमा नेपाल विजयी भएको छ ।

ओपनर कुशल भुर्तेलको शतक, कप्तान रोहितकुमार पौडेलको बलियो साथ अनि करण केसीको ५ विकेटको मद्दतमा नेपालले सिरिजको पहिलो खेल जीत्दै एक शुन्यको अग्रता लगेको हो ।

आईसीसी क्रिकेट विश्वकप लिग टूको त्रिकोणात्मक श्रृङ्खलाको पहिलो खेलमा नामिबियाले मंगलबार घरेलु टोली नेपाल सामु २ सय ८६ रनको लक्ष्य दिएको थियो । भुर्तेलको १ सय १५ रनको मदतमा नेपालले ४७ ओभर ४ बलमा ८ विकेट गुमाउँदै जीत निकालेको हो ।

नेपालले ओडीआईमा बनाएको यो अहिलेसम्मकै ठूलो स्कोर हो । नेपालले यसअघि २०१९ मा युएईविरुद्ध २ सय ५५ रनको लक्ष्य पूरा गर्दै जित निकालेको थियो भने जुनमा अमेरिकाविरुद्ध २७५ रनको लक्ष्य पछ्याउँदा स्कोर टाई गरेको थियो । गत वर्ष त्रिवि क्रिकेट मैदान, कीर्तिपुरमा पपुवा न्युगिनीविरुद्ध २९३ रनको लक्ष्य पछ्याएको नेपाल २८६ रन बनाउँदा पराजित भएको थियो ।

नेपालका ओपनर आसिफ शेख दोस्रो ओभरमै खाता नखोली आउट भएका थिए, तर अर्को ओपनर कुशलले अन्तिमसम्म टिकेर नेपालको जितको आधार तयार पारे ।

नेपाललाई जितका लागि ३ रन मात्र आवश्यक हुँदा भुर्तेल आउट भए । ११५ रन बनाउने क्रममा उनले ११३ बल खेल्दै १० चौका र ४ छक्का प्रहार गरे ।

उनले दोस्रो विकेटका लागि ज्ञानेन्द्र मल्लले ५० रनको साझेदारी गरेका थिए । नेपालको स्कोर ५३ रन हुँदा ज्ञानेन्द्र व्यक्तिगत २५ रनमा आउट भए । त्यसपछि भुर्तेल र कप्तान रोहितकुमार पौडलले मिलेर नेपालको इनिङ्स अघि बढाए । यो जोडीले तेस्रो विकेटका लागि कीर्तिमानी १३३ रनको साझेदारी गरे ।

ओडीआईमा नेपाली खेलाडीको यो अहिलेसम्मकै ठूलो साझेदारी हो । यसअघि दीपेन्द्र र देव खनालले गत वर्ष कीर्तिपुरमै पपुवा न्यु गिनी विरुद्ध १२९ रनको साझेदारी गरेका थिए ।

तर नेपालको स्कोर १८६ हुँदा कप्तान रोहित ३४औं ओभरमा आउट भए । त्यसपछि नेपालले लगातार थप दुई विकेट गुमायो । रोहितले ७६ बल खेल्दै ७ चौका र ३ छक्का मद्दतमा ७२ रन बनाए । उनले नामिबियाविरुद्ध ५५ रन जोडेपछि नेपालका लागि ओडीआईमा एक हजार रन पूरा गरेका थिए ।

त्यसपछि कुशल मल्ल ६ र दीपेन्द्र सिंह ऐरि ७ रनमा आउट हुँदा नेपालको स्कोर २१२–५ थियो । रुबेन ट्रम्पलमेनले रोहित, कुशल मल्ल र दीपेन्द्रलाई लगातार आउट गरेपछि नामिबियाले खेलमा पुनरागमन गर्ने प्रयास गरेको थियो ।