छैठौ प्याब्सन धनगढी फेस्टिबल शुरु

धनगढी । धनगढीमा छैठौं प्याब्सन फेस्टिबल सुरु भएको छ । शनिबार धनगढी स्थित क्षेत्रिय रंगशालमा विविध कार्यक्रम सहति प्याब्सन फेस्टिबल शुरु भएको हो ।    

फेस्टिबलको सुदूरपश्चिम प्रदेश खेलकुद परिषदका सदस्य सचिव दिपक सिंहले उद्घाटन गरेका हुन् । फेस्टिबल उद्घाटन गर्दै सदस्य सचिव सिंहले प्रदेशको खेल बिकासका लागि प्रदेश सरकारले काम गरिरहेको बताए । प्रदेश खेलकुद परिषद गठन भएसंगै यस क्षेत्रमा खेल गतिविधि समेत बढेका उनले बताए ।

यस बर्ष प्रयाप्त बजेट नहुँदा केही समस्या भइरहेको भन्दै उनले आगामी बर्ष खेलकुद क्षेत्रका लागि थप बजेट माग गरिने बताए । उनले नीजि क्षेत्रबाट हुने प्रतियोगितालाई सफल बनाउन प्रदेश खेलकुद परिषदले पनि सहयोग गर्दै आएको बताए । ‘खेल मानिसको अनुशासनको कडी हो,’ सिंहले भने, ‘यसले परिवार, समाज र राष्ट्रलाई नै एकताबद्ध भएर अघि बढ्ने प्रेरण दिएको हुन्छ ।’

प्याब्सन धनगढी नगर कमिटी अध्यक्ष नरेन्द्र बहादुर सिंहको अध्यक्षतामा सम्पन्न कार्यक्रममा एसपीए क्याम्पसका क्याम्पस प्रमख योगराज गौतम, प्याब्सन कैलालीका सभापति टोपेन्द्र शाह, टीकापुर प्याब्सनका अध्यक्ष मानबहादुर थापा लगायतले शुभकामना मन्तव्य व्यक्त गरेका थिए ।

धनगढीमा खेलकुद तथा क्रिकेटको चहलपहल बढाउन, युवाहरुलाई खेलप्रति उत्प्रेरित गर्न, सुदुरपश्चिमलाई खेलका माध्यमबाट देशभरि चिनाउन फेस्टिबल आयोजना गर्न लागिएको प्याब्सन धनगढीका अध्यक्ष नरेन्द्र बहादुर सिंहले बताए । फेस्टिबलका इन्डोर खेलहरु रंगशाला फागुन ६ र ७ गते हुनेछन् भने आउटडोर प्रतियोगिताहरु बिभिन्न बिद्यालयमा संचालन हुनेछन् । क्रिकेटका खेलहरु फाप्ला क्रिकेट मैदानमा फागुन ९ देखि संचालन हुनेछ  ।