नन्दिनाज  मुन २०८३ धनगढीमा शुरु

विद्यार्थीहरूमा नेतृत्व क्षमता, कूटनीतिक सीप, सार्वजनिक वक्तत्व, अनुसन्धान तथा विश्वव्यापी मुद्दाहरूप्रति सचेतना अभिवृद्धि गर्ने उद्देश्यले नन्दिनाज मोडल युनाइटेड नेसन्स (नन्दीनाज मुन २०८३)  शुक्रवार  (आज ) धनगढीमा शुरु भएको छ ।

तीन दिनसम्म  सञ्चालन हुने उक्त कार्यक्रम नन्दिनाज् एकेडेमी, रोट्र्याक्ट क्लब अफ धनगढी नेक्स्ट जेन र रोटरी क्लब अफ धनगढीको संयुक्त सहकार्यमा गरिएको हो । कार्यक्रममा १२ विद्यालयका ८० जना विद्यार्थी प्रतिनिधिहरू सहभागी  छन् ।

नन्दिनाज एकेडेमीका कार्यकारी निर्देशक महेश बिष्टको अध्यक्षतामा भएको कार्यक्रममा संयुक्त राष्ट संघ जनसंख्या कोषका सुदुरपश्चिम प्रादेशिक प्रमुख राजकुमार ढुंगाना प्रमुख अतिथिका रूपमा रहेका थिए  ।

कार्यक्रममा सहभागी विद्यार्थीहरूले विभिन्न समितिहरूमा विभिन्न राष्ट्रका प्रतिनिधिका रूपमा सहभागी भई विश्वव्यापी मुद्दाहरूमा छलफल, बहस तथा कूटनीतिक वार्ता गर्नेछन् । यस कार्यक्रमले विद्यार्थीहरूलाई आत्मविश्वासका साथ आफ्ना विचार प्रस्तुत गर्न, आलोचनात्मक सोचको विकास गर्न तथा विश्वव्यापी चुनौतीहरूको शान्तिपूर्ण समाधानका लागि सहकार्य गर्न प्रेरित गर्ने अपेक्षा गरिएको छ ।

नन्दिनाज मुन – २०८३ ले युवा पुस्तामा नेतृत्व, कूटनीति, विश्वव्यापी चेतना र सहकार्यमा आधारित सिकाइको विकासमा महत्वपुर्ण योगदान पुरयाउने विश्वास गरिएको छ ।