यू–१९ विश्वकप छनौटमा सहभागि खेलाडीलाई प्रदेश सरकारले जनही एक लाख पुरस्कार दिने

धनगढी । यू–१९ नेपाली क्रिकेट टोलीलाई विश्वकपमा पुर्याउन सफल भएका क्रिकेट खेलाडीलाई सुदूरपश्चिम प्रदेश सरकारले जनही एकलाख पुरस्कार तथा प्रदेशको लोगो झल्किने जर्सी तथा अफिसियललाई जनही ५० हजार र जसी प्रदान गर्ने घोषणा गरेको छ ।

हालै युएईमा सम्पन्न एसिया छनौट खेलमा च्याम्पियन बन्दै नेपाल सन २०२४ मा हुने आईसीसी यू–१९ विश्वकप क्रिकेटका लागि छनौंट भएको थियो । सो टोलीमा सुदूरपश्चिम प्रदेश घर भएका पाँच खेलाडीले प्रतिनिधित्व गरेका थिए । 

सुदूरपश्चिम प्रदेश सरकारको मन्त्रीस्तरीय निर्णयबाट उक्त टोलीमा प्रतिनिधित्व गरेका  पाँच खेलाडी जनही एक लाख र चार टिम अफिसियललाई जनही ५० हजार दिने घोषणा गरेको हो ।

खेलाडीको मनोबल उच्च बनाउन र खेल प्रति युवा आकर्षण बढाउन खेलाडीलाई पुरस्कार दिने घोषणा गरेको सुदूरपश्चिम प्रदेशका मुख्यमन्त्री कमलबहादुर शाहले बताएका छन् ।

नेपाली यू–१९ क्रिकेट टोलीमा सुदूरपश्चिमका दीपक बोहरा,दिपक बोहरा बी, मिलन बोहरा, हेमन्त धामी र आकाश चन्द रहेका थिए । यस्तै टिम अफिसियलमा मुख्य प्रशिक्षक जगत टमटा,सहायक प्रशिक्षक धिरेन्द्र चन्द,  व्यवस्थापक बिक्रम विष्ट,फिजियो पुरन तीरुवा रहेका थिए ।