दार्चुलामा पहिरोले घर भत्किदा दुई जनाको मृत्यु

दार्चुला

दार्चुलाको नौगाड गाउँपालिकामा पहिरोले घर भत्किँदा च्यापिएर दुई जनाको मृत्यु भएको छ । गएरातिको भारी बर्षका कारण घर माथिबाट  खसेको पहिरोले घर च्यापिँदा नौगाड गाउँपालिकाको वडा नम्बर ६ की ४२ बर्षिया मानमति ठगुन्ना र ६ बर्षिया बालिका पार्वती ठगुन्नाको ज्यान गएको हो ।

प्रहरीले उनीहरु दुबै आमाछोरी रहेको बताए पनि दुबै जना आमाछोरी नरहेको सोही गाउँपालिका घर भएका प्रदेश सभा सदस्य मान बहादुर धामीले बताए । उनीहरुको शब भत्केको घरबाट निकालिसकिएको जानकारी पाइएको प्रदेश सभा सदस्य धामीले जानकारी दिए ।

प्रहरीका अनुसार घर माथिबाट आएको पहिरोले घरको सम्पुर्ण सामान नष्ट भएको छ । पहिरोमा परी चार जना घाइते भएका छन् । पहिरोमा परेका चार जनालाई घाइते अवस्थामा गाउँलेले तत्काल उद्धार गरेको प्रहरीले जनाएको छ । पहिरोले सो गाउँका चार घर र परिगाउँ प्राथमिक विद्यालयको भवन समेत बगाएको छ ।

सो क्षेत्रबाट निर्वाचित प्रदेश सभा सदस्य धामीका अनुसार दार्चुलका अन्य क्षेत्रमा पनि भारी बर्षका कारण क्षति भएपनि नौगाड गाउँपालिकामा भने ठूलो क्षति पुगेको छ । वडा नम्बर २ कोे नौगाड खोला, घट्टे खोला र खार खोलामा रहेका १० वटा पानी घट्ट, दुई चिया पसल र १ सय किलोवाटको नौगाड लघु जलविद्युत आयोजनाको प्रशारण लाइनका १ सय २० विजुलीका खम्बाहरु बाढीले बगाएको प्रदेश सभा सदस्य धामीले जानकारी दिए ।

भारी बर्षाका कारण धौलीगाड ठाडो खोलामा आएको बाढीले महाकाली राजमार्ग समेत अबरुद्ध रहेको छ । सदरमुकाममै महाकाली नगरपालिका –२ को नमस्कार गाउँ र गल्फैंको बीचमा बग्ने सो खोलाको बाढीले राजमार्ग अवरुद्ध रहेको प्रहरीले जानकारी दिएको छ ।