सुदूरपश्चिम प्रदेश सरकारद्वारा ४६ झोलुङ्गे पुल निर्माण

धनगढी । सुदूरपश्चिम प्रदेश सरकारले ४६ वटा झोलुङ्गे पुल निर्माण गरेको छ । प्रदेश सरकारले प्रदेशका नौ वटा जिल्लामा ४६ वटा झोलुङ्गे पुल निर्माण गरेको हो ।

प्रदेश सरकार स्थापना भएपछि ६ वटा पूर्वाधार विकास कार्यालयहरुबाट हालसम्म ४६ वटा झोलुङ्गे पुल निर्माण गरेको यातायात पुर्वाधार निर्देशनालयका निर्देशक जगतप्रसाद जोशीले बताए ।

आगामी आर्थिक वर्ष २०८१÷०८२ मा झोलुङ्गे पुलको माग अत्यधिक बढेको उनले बताए ।  उनका अनुसार पूर्वाधार विकास कार्यालय बैतडीबाट १२ वटा, पुर्वाधार विकास कार्यालय डडेल्धुराबाट १२ वटा, पूर्वाधार विकास कार्यालय अछामबाट सात वटा, पूर्वाधार विकास कार्यालय कैलालीबाट नौ वटा, पूर्वाधार विकास कार्यालय कञ्चनपुरबाट तीन वटा र पूर्वाधार विकास कार्यालय बझाङबाट तीन वटा गरेर प्रदेश स्थापना भएपछि हालसम्म ४६ वटा झोलुङ्गे पुल निर्माण भएका छन् ।

यातायात पूर्वाधार निर्देशनालयका निर्देशक जोशीले भने, ‘आगामी आर्थिक वर्ष २०८१÷०८२ का लागि धेरै झोलुङ्गे पुलहरु प्रस्ताव गरेका छौँ । तिनीहरुको अध्ययन गरी १२० मिटर भन्दा छोटो भयो भने स्थानीय तहले नै बनाउने गरी अगाडि बढ्छ । १२० मिटर भन्दा लामो भयो भने त्यसलाई प्रदेशले बनाउने हो र त्यसको विस्तुत परियोजना प्रतिवेदन (डीपिआर) तयार गरी धेरै झोलुङ्गे पुलहरु बनाउने छौँ ।’

पहिला पहाडी जिल्लाहरुमा धेरै झोलुङ्गे पुलको माग बढी आउने गरेको भएपनि अहिले तराईका जिल्लाहरुमा पनि धेरै झोलुङ्गे पुलको माग आउने गरेको उनले बताए । कैलाली र कञ्चनपुरमा पनि झोलुङ्गे पुल निर्माणको संख्या बढिरहेको उनले बताए । 

‘बस्तीहरु बढदै जान थालेका छन् । स–साना बस्तीहरुलाई पनि जोडनका लागि हो । सडक पु्ल बनायो भने त धेरै मंहगो हुने भयो,झोलुङ्गे पुल त सस्तोमा पनि बन्ने भयो । सबै ठाँउ सडक पुल बनाउन सकिन्न । सडक पुल बनाउदा मंहगो पर्छ । त्यसैले नदी किनाराका दुईटा बस्तीहरु जोड्नका लागि धेरै मागहरु आएको छ । त्यसैले मागहरु आएकोमा झोलुङ्गे पुल बनाउन लागि नै राख्या छौँ ।’ 

कैलालीको खुटिया नदी, ठूलीगाड, शिवगंगा, कान्द्रा नदीहरुमा झोलुङ्गे पुल बन्ने भएको छ । आगामी आर्थिक वर्ष २०८१÷०८२ मा झोलुङ्गे पुलको माग बढी आएकाले स्रोत साधनले भ्याएसम्म डीपिआर बनाएर झोलुङ्गे पुल निर्माण गर्ने लक्ष्य लिएको उनले बताए । प्रदेशभरिबाट आगामी वर्षका लागि ५० वटा भन्दा बढी झोलुङ्गे पुल निर्माणको मागहरु आएको उनको भनाइ छ । 

प्रदेश सरकारको झोलुङ्गे पुल रणनीतिमा १२० मीटर भन्दा कम लम्बाईका झोलुंगे पुलहरुको लागि प्रदेश सरकारले बजेट बिनियोजन गर्ने, निर्माण चाहि पालिकाले गर्ने रहेको छ । 

१२० मिटर भन्दा बढी लम्बाइका  झोलुंगे पुलहरु  प्रदेश सरकार आफैले डीपिआर बनाएर निर्माण गर्ने रणनीति बनाएको छ । आगामी वर्षका लागि माग भएर आएका झोलुङ्गे पुलहरुछनोट गरेर निर्माण प्रक्रिया अगाडि बढाउने निर्देशक जोशीले बताए । सुदूरपश्चिममा अहिलेसम्म ११ सय झोलुङ्गे पुल निर्माण भएका छन् ।