नेपालमा कोरोनाका कारण मृत्यु हुनेको संख्या १५ पुग्यो

धनगढी

    नारायणी सामुदायिक अस्पताल भरतपुरमा कोरोना सङ्क्रमणका कारण एक बिरामीको मृत्यु भएको छ । उनको आज (मंगलबार) बिहान मृत्यु भएको अस्पतालले पुष्टि गरेको छ । यो सँगै नेपालमा कोरोना संक्रमणका कारण मृत्यु हुनेको संख्या १५ पुगेको छ ।

  भरतपुर अस्पताल अन्तगर्तको कोभिड १९ विशेष अस्पतालका प्रमुख डा. प्रमोद पौडेलका अनुसार मृत्यु भएका ब्यक्ति नारायणी सामुदायिक अस्पतालको सघन उपचार कक्षमा भेन्टिलेटरमा रहेका थिए ।

    शुक्रबार स्वाब परीक्षणका लागि पठाइएकोमा सोमबार नतिजा आएको थियो । भरतपुर महानगरपालिका–११ सामनाटोलका गुरुङ समुदायका ती व्यक्ति ६८ वर्षका हुन् । प्रमुख जिल्ला अधिकारी नारायणप्रसाद भट्टराईले शवको व्यवस्थापन नेपाली सेनाले गर्ने बताए ।

   परिवारको परामर्शमा धार्मिक विधिअनुसार शव व्यवस्थापन गरिने उनले जानकारी दिए ।