धनगढीमा अनुपमा भेट्रान क्रिकेटको ट्रफी सार्वजनिक

धनगढी । धनगढीमा चैत ५ गतेदेखि हुने अनुपमा कर्पोरेट लिग सिजन २ भेट्रान क्रिकेट कपको ट्रफी सार्वजनिक भएको छ। अनुपमा बेकरी एण्ड क्याफेले शनिवार पत्रकार सम्मेलन गर्दै ट्रफी सार्वजनिक गरेको हो ।

धनगढी उपमहानगरपालिका वडा नम्बर ३ को चन्द्र सूर्य क्रस खेलमैदानमा हुने प्रतियोगिताको सोही वडाका वडाध्यक्ष राजबहादुर ऐरले ट्रफी सार्वजनिक गरेका हुन् । 

अनुपमा बेकरी एण्ड क्याफेका सञ्चालक एवम् प्रतियोगिताका संयोजक दिनेश पन्तले खेलको माध्यमबाट समाजलाई चिनाउने उद्देश्यले गत वर्षदेखि खेलहरू गर्दै आइरहेको बताए ।

यस खेल मैदानको संरक्षणका लागि पनि आफूहरूले खेलहरू गर्दै आइरहेको उनले बताए । उनले यो खेलमैदानको संरक्षणमा वडा कार्यालयको पनि ध्यान जानुपर्ने बताए । 

प्रतियोगितामा एउटा टिम नेपालगन्जको र ११ वटा टिम सुदूरपश्चिमको गरेर १२ टिमको सहभागिता रहने आयोजकले जनाएको छ। प्रतियोगिताको विजेता टिमले ७५ हजार रुपैयाँ पुरस्कार प्राप्त गर्नेछ भने उपविजेताले ३५ हजार रुपैयाँ पाउनेछ।

उत्कृष्ट प्रदर्शन गर्ने खेलाडीहरूलाई दस हजार पुरस्कारको व्यवस्था गरिएको छ। उत्कृष्ट बलर र उत्कृष्ट ब्याट्सम्यान दुवैले ५÷५ हजार रुपैयाँ पुरस्कार प्राप्त गर्नेछन्। प्रतियोगिताको अनुमानित खर्च पाँच लाख ४० हजार रुपैयाँ रहेको आयोजकले जनाएको छ। प्रतियोगिता चैत १४ गतेसम्म सञ्चालन हुनेछ।