बिपीन जोशीको शव  कन्चनपुरमा घरमा आफन्तलाई बुझाइयो

विपीन जोशीको शव  आइतबार कन्चनपुरमा उनको परिवारलाई बुझाइएको छ । इजरायलबाट काठमाण्डौं आइपुगेको लगत्तै बिमानबाट धनगढी बिमानस्थल हुदै बिपीनको शव नेपाली सेनाको टोलीले  कञ्चनपुरको भिमदत्तनगरपालिकास्थित घरमा लगेर  परिवारलाई बुझाएको हो ।

कञ्चनपुरस्थित महाकाली घाटमा उनको अन्तिम दाह संस्कार गरिने बताइएको छ । धनगढी बिमानस्थलबाट महाप्रस्थानयानमा राखेर शव विपिनको घरमा लगिएको हो ।

शवसँगै नेपालका लागिइजरायलका राजदुत पनि सँगै आएका छन् ।

अध्ययनको सिलसिलामा इजरायल पुगेका कञ्चनपुरका विपिन जोशी गत २०२३ अक्टुबर ७ मा हमासले किबुत्ज क्षेत्रमा गरेको आक्रमणको क्रममा बन्धक बनाइएका थिए । त्यसपछि उनको अवस्था अज्ञात रहेकोमा गत असोज २७ गते इजरायली अधिकारीहरूले उनको मृत्यु भएको पुष्टि गरेका थिए ।

   इजरायल र हमासबीच युद्धविराम सम्झौतापछि बन्दी साटासाट गर्ने क्रममा हमासले विपिनको शव इजरायली सेनालाई हस्तान्तरण गरेको थियो ।