काठमाण्डू गोर्खाजले  दियो  चितवन राइनोजलाई एक सय ४३ रनको लक्ष्य

नेपाल प्रिमियर लिग (एनपीएल) क्रिकेटको शुक्रबारको पहिलो खेलमा काठमाण्डू गोर्खाजले चितवन राइनोजलाई जितका लागि एक सय ४३ रनको लक्ष्य दिएको छ ।

कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको काठमाण्डूले १९.४ ओभरमा अलआउट हुँदै एक सय ४२ रन बनाएको हो ।

काठमाण्डूका लागि जोन सिम्पसनले उत्कृष्ट अर्धशतकीय पारी खेले । पाँचौं नम्बरमा क्रिज समाल्न आएका विकेटकिपर ब्याट्सम्यान सिम्पसन आक्रामक ब्याटिङ गर्दै ६० रन बनाए ।

सिम्पसनले केवल २९ बलमा पाँच छक्का र तीन चौका प्रहार गरे । उनले केवल २५ बलमा चार छक्का र तीन चौकाको मद्दतले आफ्नो अर्धशतक पूरा गरेका थिए ।

सिम्पसनको अर्धशतक जारी सिजनको एनपीएलमा बनेको १५औं अर्धशतक हो । उनी जारी सिजनको एनपीएलमा अर्धशतक बनाउने १२औं ब्याट्सम्यान पनि हुन् ।

काठमाण्डूले केवल २४ रनको कुल स्कोरमा तीन विकेट गुमाएको थियो । त्यसपछि सिम्पसन र मिलिन्द कुमारले टोलीको स्कोरलाई एक सय २२ रनको बलियो स्थितिसम्म डोर्‍याए ।

सिम्पसन र मिलिन्द कुमारले ९८ रनको साझेदारी गरे । चौथो नम्बरमा क्रिज समाल्न आएका मिलिन्द कुमार ३८ रन बनाउँदै आउट भए । उनले ४३ बलमा पाँच चौका प्रहार गरे ।

ओपनर ब्याट्सम्यान बेन चार्ल्सवर्थ १३ रन बनाउँदै आउट भए । अर्का ओपनर आकाश त्रिपाठी पनि चार रनभन्दा अगाडि बढ्न सकेनन् ।

तेस्रो नम्बरमा क्रिज समाल्न आएका रासिद खान पनि ६ रनमै पेभेलियन फर्किए । मोहम्मद आदिल आलम पाँच बलमा एक चौकाको मद्दतले केवल आठ रन बनाउँदै आउट भए ।

चितवनका बलर सोहेल तनवीर एक्लैले चार विकेट लिए । उनले चार ओभरमा केवल २५ रन खर्चिए । रञ्जीतकुमार र कमल ऐरीले दुई/दुई विकेट हात पारे । रवि बोपराले एक विकेट लिए ।