प्रदेश सभामै दोहोरिने प्रयास

धनगढी । पहिलो प्रदेश सभा निर्वाचन २०७४ मा बाम गठबन्धनबाट उम्मेदवार थिए नेकपा एमालेका पठानसिंह बोहरा । २०७४ सालमा प्रदेश सभामा निर्वाचित भएका बोहरा आगामी मंसिर ४ गते हुन लागेको प्रदेश सभामा पुनः उम्मेदवार बन्ने भएका छन् ।

आईतबार डडेल्धुरामा उनले निर्वाचन क्षेत्र नम्बर १ बाट उम्मेदवारी दर्ता गराएका छन् । डडेल्धुरामा पठानसंग नेकपा माओवादी केन्द्रबाट उम्मेदवार बनेका खगराज भट्टबीच प्रतिष्पर्धा हुने भएको छ ।

२०७४ सालमै सम्पन्न प्रदेश सभा निर्वाचनमा बाजुरा क्षेत्र नम्बर १ को प्रदेश सभा ‘१’ बलदेव रेग्मी निर्वाचित भए । मंसिर ४ गते हुन लागेको प्रदेश सभा निर्वाचनका लागि उनले पनि उम्मेदवारी दर्ता गराएका छन् ।

पुर्व प्रदेश सभा सदस्य बोहरा र रेग्मी झै २०७४ सालको निर्वाचनमा निर्वाचित आधा उम्मेदवारहरुले पुनः प्रदेश तथा प्रतिनिधि सभाको निर्वाचनमा उम्मेदवारी दर्ता गराई प्रतिष्पर्धा गर्न लागेका छन् । प्रदेश सभामा दोहोरिन चाहेर उम्मेदवारी दर्ता गराउनेमा मन्त्री, पुर्व मन्त्रीदेखि संसदीय समितिका सभापति, प्रमुख सचेतक, प्रदेश सभा सदस्यहरु रहेका छन् ।

एकीकृत समाजवादी पार्टीकै इन्चार्ज समेत रहेका दीर्घबहादुर सोडारीले कैलाली क्षेत्र नम्बर ४ प्रदेश सभा ‘१’ बाट उम्मेदवारी दर्ता गराई प्रदेश सभामा दोहोरिने तयारी गरिरहेका छन् । उनी प्रदेशको भौतिक पुर्वाधार मन्त्री समेत हुन् ।

पुर्व सामाजिक विकास मन्त्री समेत रहेका लालबहादुर खडकाले एकीकृत समाजवादी पार्टीबाट कञ्चनपुर क्षेत्र नम्बर १ प्रदेश सभा ‘२’ बाट उम्मेदवारी दर्ता गराएका छन् । 

नेकपा एमालेबाटै कैलाली क्षेत्र नम्बर ५ को प्रदेश सभा ‘१’ नेपालु चौधरीले उम्मेदवारी दर्ता गराएका छन् । उनी प्रदेश सभामा विद्यायन तथा प्रदेश मामिला समिति सभापति पनि थिए ।

बैतडी क्षेत्र नम्बर १ को प्रदेश सभा ‘२’ मा नेकपा एमालेबाट लिलाधर भट्टले आईतबार उम्मेदवारी दर्ता गराए । उनी नेकपा एमालेको संसदीय दलको प्रमुख सचेतक समेत बनिसकेका छन् ।

२०७४ सालमा बाम गठबन्धनबाट नेकपा एमालेबाट उम्मेदवार बनेर कैलाली क्षेत्र नम्बर २ प्रदेश सभा १ बाट निर्वाचित बनेका थिए रतन थापा । २०७९ सालको निर्वाचनमा पार्टीको विधान विपरित कार्य गरेको भन्दै पार्टीले अनुशासनको कारबाही गरेपछि उनी नागरिक उन्मुक्ति पार्टीमा प्रवेश गरेका थिए । अब हुने प्रदेश सभा निर्वाचनमा उनले आईतबार निर्वाचन अधिकृतको कार्यालयबाट उम्मेदवारी दर्ता गराएका छन् ।

सुदूरपश्चिम प्रदेशको आन्तरिक मामिला तथा कानुन मन्त्री रहेका रणबहादुर रावलले आईतबार टीकापुरस्थित निर्वाचन अधिकृतको कार्यालयमा प्रदेश सभामा उम्मेदवारी दर्ता गराए । उनले कैलाली क्षेत्र नम्बर १ प्रदेश सभा ‘२’ मा नेपाली काँग्रेसका तर्फबाट उम्मेदवारी दर्ता गराएका हुन् ।

उद्योग, पर्यटन, वन तथा वातावरण मन्त्री रहेका नेकपा माओवादी केन्द्रका मान बहादुर धामीले दार्चुला क्षेत्र नम्बर १ प्रदेश सभा ‘२’, सामाजिक विकास मन्त्री गोविन्दराज बोहराले डडेल्धुरा प्रदेश १ क्षेत्र नम्बर २, आर्थिक मामिला राज्यमन्त्री प्रकाश रावलले कञ्चनपुर क्षेत्र नम्बर ३ प्रदेश सभा ‘१’, पूर्व आर्थिक मामिला राज्यमन्त्री अमर बहादुर साउदले कैलाली क्षेत्र नम्बर ३ प्रदेश सभा ‘२’ बाट उम्मेदवारी दर्ता गराएका छन् ।

प्रदेश सभा सदस्य रहेका माओवादी केन्द्रका अक्क लबहादुर रावलले अछाम क्षेत्र नम्बर २ प्रदेश सभा ‘१’ र लोकतान्त्रिक समाजवादी पार्टीका कृष्णबहादुर चौधरीले कैलाली क्षेत्र नम्बर १ प्रदेश सभा ‘१’ मा उम्मेदवारी दर्ता गराएका छन् ।

२०७४ को निर्वाचनमा प्रत्यक्ष बिजयी भएका सुदुरपश्चिम प्रदेश सभाका ३२ प्रदेश सभा मध्य यस पटकको निर्वाचनमा  १३ जना प्रदेश सभाकै लागि पुनः प्रतिस्पर्धाममा उत्रिएका छन् । 

प्रतिनिधि सभामा प्रयासरत प्रदेश सभा सदस्य 

२०७४ सालको निर्वाचनमा नेपाली काँग्रेसबाट प्रदेश सभामा निर्वाचित भए डिल्लीराज पन्त । मंसिर ४ गते हुन लागेको प्रतिनिधि तथा प्रदेश सभा निर्वाचनका लागि आईतबार उनले सत्ता गठबन्धनका तर्फबाट कैलाली निर्वाचन क्षेत्र नम्बर ५ बाट प्रतिनिधि सभामा उम्मेदवारी दर्ता गराएका छन् ।

२०७४ सालमै प्रदेश सभा सदस्य बनेका पुर्व आर्थिक मामिला मन्त्री तारा लामा तामाङले आईतबार कञ्चनपुर क्षेत्र नम्बर १ मा नेकपा एमालेबाट प्रतिनिधि सभामा उम्मेदवारी दर्ता गराएका छन् । उनी सत्ता गठबन्धनका उम्मेदवार नेकपा माओवादी केन्द्रकी बिना मगरसंग प्रतिष्पर्धा गर्ने छन् ।

प्रदेशको आर्थिक मामिला मन्त्रीको नेतृत्व गरिसकेका नेकपा एमालेका झपट बहादुर बोहराले अछाम क्षेत्र नम्बर १ बाट प्रतिनिधि सभाको लागि उम्मेदवारी दर्ता गराएका छन् ।

पहिले प्रतिस्पर्धा, अहिले सहकार्य

कञ्चनपुर क्षेत्र नम्बर १ प्रदेश सभा २ बाट आईतबार नेपाली काँग्रेसबाट दिवानसिंह विष्टले उम्मेदवारी दर्ता गराएका छन् । बाम लोकतान्त्रिक गठबन्धन तर्फबाट कञ्चनपुर क्षेत्र नम्बर १ मा नेकपा माओवादी केन्द्रकी विना मगरले उम्मेदवारी दर्ता गराएपछि विष्टले प्रदेशमा उम्मेदवारी दर्ता गराएका हुन् ।

२०७४ सालको निर्वाचनमा बिष्ट नेकपा माओवादी केन्द्रकी उम्मेदवार मगरसंग पराजित भएका थिए । ३६ हजार दुई सय ९५ मत खसेकोमा मगरले ३८ हजार चार सय ६७ मत प्राप्त गर्दै निर्वाचित भएकी थिइन । नेपाली काँग्रेसबाट निर्वाचनमा भाग लिएका विष्टले १९ हजार दुई सय १९ मत प्राप्त गर्दै मगरलाई पन्छ्याएका थिए ।

आगामी प्रतिनिधि तथा प्रदेश सभा निर्वाचनमा विष्ट र मगर संगै मिलेर प्रचार–प्रसारमा होमिएका छन् । विष्टले अहिले पनि प्रतिनिधि सभामा उम्मेदवारी दर्ता गराउने चर्चा रहेको थियो । यद्यपी बाम–लोकतान्त्रिक गठबन्धनका कारण उनी प्रदेशमा उम्मेदवारी दिनु परेको जनाइएको छ ।

प्रतिनिधि सभापछि प्रदेशको प्रतिस्पर्धामा 

२०७४ सालमा बाजुरा निर्वाचन क्षेत्र नम्बर १ बाट प्रतिनिधि सभा सदस्य हुन लाल बहादुर थापा । आगामी मंसिर ४ गते हुन लागेको निर्वाचनमा उनले बाजुराको प्रदेश सभा ‘ख’ बाट उम्मेदवारी दर्ता गराएका छन् ।

आईतबार मुख्य निर्वाचन अधिकृतको कार्यालयमा पुगेर थापाले प्रदेश सभामा नेकपा एमालेबाट उम्मेदवारी दर्ता गराएको निर्वाचन कार्यालय कैलालीले जनाएको छ ।

थापाले २०७४ सालको प्रतिनिधि निर्वाचनमा २८ हजार ६५ मत प्राप्त गरि प्रतिनिधि सभा सदस्य बनेका थापाले प्रतिनिधि सभामा टिकट नपाएपछि प्रदेशमा उम्मेदवारी दर्ता गराएका हुन्  । उनी एमाले पार्टीका केन्द्रिय सदस्य तथा बाजुरा जिल्ला इन्चार्ज समेत हुन । नेकपा एमालेबाट प्रतिनिधि सभामा आईतबार कर्णबहादुर थापाले उम्मेदवारी दर्ता गराएका छन् । २०७४ को निर्वाचनमा   कर्ण बहादुर  थापा प्रदेशमा समानुपातिकमा बसेका थिए ।