ओन्डरल्याण्डमा बालबालिकाको सिकाइ र  स्वास्थ्यमा ख्याल गर्छौ : झा

 प्रि प्राइमरी भनेको केहो ?

प्रि–प्राइमरी भनेको बालबालिकालाई आधारभुत ज्ञान दिने हो । १८ महिनादेखि ३ बर्षसम्मका बालबालिकालाई राम्रो वातावरणमा हुर्काउन प्रि–प्राइमरी स्कुल आवश्यक हुन्छन् । जहाँ आधारभुत ज्ञान दिइन्छ । बालबालिकालाई राम्रो बोल्न सिकाउने म बाट मेरो भन्ने भावनाको विकास गराउने र सामुहिकताको भावना जगाउँदै सिकाउने कार्य प्रि–प्राइमरीमा गरिन्छ ।

बालबालिकालाई प्रि–प्राइमरीमा पढाउदा के फाइदा हुन्छ ?

अहिलेको जेनेरेसनमा बालक आमा बुबा बाहेक अन्य समुदायमा हुर्कन पाएको हुँदैन । जसका कारण उसमा सामाजिक भावनाको विकास हुन पाएको हुदैन । उसले आफ्नो उमेरको बालबालिकासंग खेल्न वातावरण घरमा पाएको हुँदैन । 

त्यस्तो अवस्थामा उसलाई सामाजिक परिवेसका बारेमा जानकारी दिन सक्नु अहिलेको अपरिहार्यता रहेको छ ।

प्रि–प्राइमरी कक्षामा आउँदा घरमा एक्लो रहेको बालकले आफ्नो उमेरका बालबालिकासंग खेल्ने मौका पाउछ र सामुहिक भावनाको उसमा विकास हुँदै जान्छ । बालकलाई घरमा भन्दा स्कुलमा बालकलाई परिवर्तन गर्न सजिलो पनि हुन्छ । किनकी स्कुलमा एक विद्यार्थीले गर्ने कार्य अन्य बालकले सहजै सिक्न सक्दछ ।

विद्यालयमा के–के सुविधा छन् ?

ओन्डरल्याण्डमा बालबालकालाई हाइजिनिक र स्वस्थकर खाना तथा फलफुल दिने गरेका छौं ।

म आफु पनि स्वास्थ्य क्षेत्रमा काम गर्ने परिवारमा हुर्केको हुँदा स्वस्थकर खाना र कसरी स्वस्थ रहन सकिन्छ भन्ने बारेमा ज्ञान रहेको छ । त्यसैले हामीले बालबालिकाको स्वास्थ्यलाई विशेष ख्याल गर्ने गरेका छौं । मैदाले बनेको र जंङ्ग फुड स्कुलमा प्रतिबन्ध गरेका छौं ।

त्यसका अलावा विद्यालयमा बाल मैत्री वातावरण छ । बालबालिकालाई सहज हुने पुर्वाधार तयार गरेका छौं । त्यसले पनि बालबालिकामा हौसला थपिने गरेको छ ।

त्यसैगरी बालबालिकालाई उनीहरुको मनोविज्ञान अनुसार सिकाईमा जोड्ने गरेका छौं । कसैले दृश्य सामाग्रीका माध्यमबाट बढी सिकने गर्दछन् भने कसैलाई श्रव्य सामाग्रीमा चासो हुन्छ । त्यसैले हामीले बालबालिकाको मनोविज्ञान अनुसारको सिकाई माध्यमहरुको व्यवस्था गरेका छौं ।

बालबालिकालाई खेल्नका लागि पनि हामीले इन्डोर मैदान तयार गरेका छौं । जसका कारण बालबालिकाले गर्मीमा पनि बाहिर जानु पर्र्दैन । बालबालिकाको शारिरीक तन्दुरुस्तीका कारण खेल्नु अपरिहार्य हुन्छ । त्यसैगरी खेलबाट पनि बालबालिकाले धेरै कुरा सिक्ने गरेको हुन्छ ।

अभिभावकको चाहना अनुसार हामीले यस शैक्षिक शत्रदेखि कक्षा १ सम्म पनि पठनपाठन गराइ रहेका छौं । आगामी बर्षदेखि कक्षा ३ सम्म पढाउने योजना रहेको छ ।

हामीले अभिभावकलाई पनि सिकाउने तरिका सिकाइ रहेका हुन्छौं । कतिपय अभिभावकले बालबालिकालाई घरमा जबरजस्ती पनि सिकाउने कोशिस गर्नु हुन्छ । तर बालबालिकालाई जबरजस्ती गर्नु हुदैन भन्ने कुरा पनि हामीले अभिभावकलाई सिकाई रहेका हुन्छौं । कपि किताब भन्दा व्यवहारिक तरिकाले बालबालिकालाई बढी सिकाउन सकिन्छ । जुन कुरा हामीले अभिभावकलाई पनि सिकाउने गरेका छौं । यसकारण हाम्रा अभिभावक पनि खुशी हुनुहुनछ ।

विद्यालयमै हामीले बालबालिकाको स्वास्थ्य परिक्षण गराउदै आएका छौं । त्यसका अलावा हाम्रो स्कुलमा अध्ययन गर्ने बालबालिकाको उपचारका लागि नवजीवन अस्पतालसंग सम्झौता गरेका छौं । त्यहाँ उपचार गर्दा अभिभावले केही छुट पनि पाउनु हुन्छ ।