एसईईको नतिजाको  लागि बिद्यालयले असार २० भित्र  बिद्यार्थीको प्राप्ताङक पठाइसक्नु पर्ने

काठमाण्डौ ।  माध्यमिक शिक्षा परीक्षा (एसईइ) को नतिजा आन्तरिक मुल्याङकनक आधारमा  प्रकाशन गर्न  राष्ट्रिय परीक्षा बोर्डले असार २० गतेभित्र  बिद्यार्थीको प्राप्ताङक जिल्ला स्थित शिक्षा बिकास तथा समन्वय इकाईमा पठाइसक्न बिद्यालयहरुलाई निर्देशन दिएको छ । बोर्डले गत बर्ष पनि आन्तरिक मुल्याङकनका आधारमा नै एसइइको नतिजा प्रकाशन गरेको थियो ।

कक्षा १० का बिद्यार्थी मुल्याङकन, नतिजा प्रकाशशन तथा प्रमाणीकरण कार्यबिधि २०७८ बमोजिम बिद्यार्थीहरुको आन्तरिक मुल्याङकन गरेर प्राप्ताङक पठाउन बोर्डले  सोमबार सर्कुलर  जारी गरेको हो । बोर्डले कार्यबिधि २०७७ संशोधन गरे कार्यबिधि २०७८ जारी गरेको हो ।

विद्यालयले पठाएको आन्तरिक मुल्याङ्कन र जिल्लाका सबै विद्यार्थीको अभिलेख रुजु गरी असार मसान्तभित्र समन्वय समितिले राष्ट्रिय परीक्षा बोर्डमा पठाइसक्नु पर्ने बोर्डका अध्यक्ष प्रा डा. चन्द्रमणि पौडेलले जानकारी दिए ।

असार अन्तिमसम्ममा सबै जिल्लाबाट अभिलेख आए त्यसको १५ दिनभित्र एसईईको अन्तिम नतिजा प्रकाशन गर्ने र प्रमाणपत्र जारी लगायतको काम बोर्डले गर्ने भएको छ । कुनै अवरोध नभए बोर्डले एसईईको नतिजा आउँदो साउन १५ भित्र पुरा सार्वजनिक गर्न सक्ने र भदौदेखि कक्षा ११ को पढाइ सुरु गर्न सक्ने गर्ने गरी बोर्डले नतिजा प्रकाशनको तयारी गरेको जनाएको छ ।

कार्यबिधिको अनुसुचीमा समाबिष्ट फारामहरुमा बिधिको नम्बर भरेर पठाउनु पर्ने बोर्डले जनाएको छ ।

बोर्डले विद्यार्थीको आन्तरिक मुल्याङ्कन गर्न मुख्य विषय शिक्षकहरूलाई जिम्मेवार बनाउँदै विद्यालयका प्रधानाध्यापक, वरिष्ठ शिक्षक, अङ्ग्रेजी, गणित र विज्ञान शिक्षक गरी पाँच जना सम्मिलित पाँच सदस्यीय समिति बनाएर उनीहरुले गरेको हस्ताक्षर सहितको अन्तिम मुल्याङ्कनलाई आधार मानेर नतिजा सार्वजनिक गर्ने भएको छ ।

गएको वर्ष प्रधानाध्यापक एक्लैले गरेको र जथाभाबी नम्बर हालेर पठाएको गुनासो आएपछि यस पटक पाँच सदस्यीय समिति बनाउने निर्णय गरेको हो । विद्यार्थीको अत्याधिक मुल्याङ्कन गरिए कारण खोल्नुपर्ने प्रावधान बोर्डले राखेको छ । त्यसमा सहमत हुन नसकिएको अवस्थामा त्यस मुल्याङ्कनलाई फिर्ता गर्न सक्ने प्रावधान परीक्षा सम्बन्धी कार्यविधिमा राखिएको बोर्डले जनाएको छ ।