​​​​​​​वडा नम्बर ८ मा मात्रै एक हजार दुई सय घरधुरी डुबानमा

भजनी
गएरातिदेखिको अविरल बर्षाले कैलाली जिल्लाको भजनी नगरपालिकाको अधिकांश क्षेत्र डुबानमा परेको छ । 

भजनी नगरपालिकाको वडा नम्बर ८ मा १ हजार २ सय घर डुबानमा परेको वडा नम्बर ८ का वडा अध्यक्ष पंकज चौधरीले जानकारी दिएका छन् । अध्यक्ष चौधरीका अनुसार वडा नम्बर ८ को सखरवामा स्थानीय रामकुमार चौधरीको घर नजिक तटबन्ध भत्काउँदै पथरिया नदी गाउँ पसेपछि दैलेखी टोल, कुसुमघाट, कृष्णनगर, गोरचौडा, खैरा र सोनाहाफाँटा गाउँ डुबानमा परेका छन् । गोरचौडामा बढीमा फसेका एक युवालाई प्रहरीले उद्धार गरेको छ भने उनी चढेको मोटरसाइकल बाढीमा बगेको छ । से ३ प ४६७० नम्बरको मोटरसाइकलमा रहेका भजनी –३ कन्हैयापुरका अस्मित चौधरीलाई उद्धार गरिएको प्रहरीले जानकारी दिएको छ ।

उनी गोरचौडामा आफन्तलाई भेट्न गएका थिए । वडा नम्बर ३ मा काँडा नदीले ढुसीमा तटबन्ध भत्काएको छ । नदी गाउँ पसेपछि पकरिया डाँडा, ढुसी गाउँ, कन्हैयापुर डुबानमा परेका छन् । वडा नम्बर ५ लालबोझीमा मा ३ सय ५० घर डुवानमा परेपछि त्यहाँका १ हजार ८ सय मानिसहरुलाई उद्धार गरी हुलाकी राजमार्गमा ल्याइएको कैलालीका प्रहरी उपरिक्षक अनुपम शमशेर जबराले बताएका छन् । वडा नम्बर ५ पुलियापुरमा नदी किनारमा रहेका १४ घरघुरी जोखिममा रहेको वडा अधयक्ष केशब बुढाले बताए । बुढाका अनुसार ती घरहरु खाली गराइएको छ । र डुबानका परेका मानिसहरुलाई सुरक्षित रुपमा हुलाकी राजमार्गमा पु¥याइएको छ ।