दुई दशकपछि विद्युत विस्तार

महेन्द्रनगर

  कञ्चनपुरको भीमदत्त नगरपालिका–९ स्थित खल्ला मछेट्टीमा दुई दशकपछि विद्युत विस्तार सुरु भएको छ । विक्रम सम्वत २०५५ सालमा बसेको बस्तीमा अहिले आएर विद्युत विस्तार हुन लागेको हो ।

  नेपाल विद्युत प्राधिकरण महेन्द्रनगर शाखा र भीमदत्त नगरपालिकाको संयुक्त साझेदारीमा नगरकै दुर्गम क्षेत्र खल्ला मछेट्टीमा विद्युत विस्तार गरिन लागिएको छ । भीमदत्त नगरपालिका वडा नम्बर ९ का अध्यक्ष राम नाथले विद्युतको मेनलाइनको विस्तार गर्ने कार्य भैरहेको जानकारी दिए । नाथले द्धन्द्धकालिन समयबाट बसोबास रहेको खल्ला मछेट्टीलाई विकाससँग जोड्नका लागि विद्युत विस्तार गरिएको बताए ।

  “लामो समयदेखि ऐलानी जमिनमा बसोबास गरिरहेका समुदायलाई विकाससँग जोड्न विद्युत विस्तारको कार्य भैरहेको छ ।” अध्यक्ष राम नाथले भने, “केही वर्षमै खल्ला मछेट्टीका समुदायलाई सडग मार्गमा जोडियो, यसपटक समुदाय स्तरमा भने विद्युत जोड्ने योजना छ ।”

 वडा कार्यालय स्थित ब्रहम्देव बजारबाट झण्डै ६ किलो मिटर टाढा रहेको उक्त बस्तीलाई विद्युतसँग जोड्न पोल गाड्ने काम भने सकिएको छ । नगरको दुर्गम वडाका रुपमा चिनिने वडामा पछिल्लो समयमा भने विकासका पुर्वाधारलाई जोड्ने काम भने तिव्र रुपमा भैरहेकोे वडा अध्यक्ष नाथले बताए ।

खल्ला मछेट्टी र टुडिखेल गरी तीन ओटा गाउँ रहेको उक्त ठाउँका मानिसहरु ब्रह्रमदेव एक घण्टा हिडेर पुग्ने गर्दछन् । विगतका दिनमा बिरामी भएको बेला तथा कुटाई पिसाई गर्न पनि हिडेर जानुपर्ने बाध्यता भए पनि अघिल्लो दुई वर्षदेखि गाउँमा मोटर बाटो पुग्दा हिड्नु पर्ने बाध्यता भने हटेको छ । झण्डै ३ सयदेखि ४ सय घर परिवार रहेको खल्ला मछेट्टीलाई आर्थिक वर्ष भित्रै विजुली जडान कार्य सक्ने योजनामा वडा कार्यालय रहेको छ ।

“पोल गाड्ने काम सकिए पनि भने मेनलाइन जडानकोे काम चलिरहेको छ, सडक किनारमा भएका घरपरिवारलाई भने साउन महिना भित्रै मेनलाइनबाट बिजुली जडान गर्ने गरी विद्युत जडानको कार्य भैरहेको छ ।” अध्यक्ष नाथले भने, “आर्थक वर्षभित्र गाउँभरीका सवै घरधुरीमा विजुलि जडान गरिनेछ ।”

  साउन महिनाबाटै भोल्टेज कम हुन नदिनको लागि तीन ओटा गाउँमा तीन ओटा ट्रान्समिटर राखेर विद्युत आपुर्ती समेत उनले बताए ।

खल्ला मछेट्टी क्षेत्रमा द्धवन्द्ध कालमा बसोबास गरेकोले यहाँका स्थानिय सवैको जमिन दर्ता नभई ऐलानीमै छ । विद्युत जडान गर्दा लालपुर्जा चाहिन्छ । तर वडा कार्यालयले भने बसोबासका आधारमा मिटर वितरण गर्ने योजना बनाएको छ ।

 “दुई दशक भन्दा लामो समयदेखिको बसोबास भए पनि जमिन भने दर्ता प्रक्रियामै छ, जमिन दर्ता प्रक्रियामै भए पनि वडाबासीलाई बसोबासका आधारमा मिटर वितरण गर्ने योजना छ । विद्युतको पहुँच गरिए सँगै आगामी दिनमा दर्ता प्रक्रिया दर्ता मै रहिरहने भने होइन, ढिलोचाँडो दर्ता गर्ने कार्य पनि सकिने विस्वास छ ।” वडाध्यक्ष नाथले भने, । वडाध्यक्ष नाथले विद्युतको पहुँच पुगाए पनि आउँदो दिनमा भने खानेपानी लगायतको पहुँच सृजना गरिने बताए ।

“विगतका दिन देखी अहिले सम्मै विद्युत नभएर धेरै समस्या भएको छ, कुटाई, पिसाई लगायत मोवाइल चार्ज गर्न पनि एक घण्टाको दुरीमा बजार जानु पर्ने बाध्यता थियो ।” भीमदत्त नगरपालिका–९ स्थित खल्लाकी अञ्जली देवी बोहराले भनिन्, “विद्युत आउने भनेर सुन्ने मात्रै गरिन्थ्यो, अव विद्युत जडान कार्य भएपछि भने थोरै भएपनि खुसी लागको छ ।” विद्युत विस्तार भएपछि कुटाई पिसाई लगायत चार्ज गर्न एक घण्टा टाढा जानु पर्ने समस्या पनि हट्ने उनले बताइन् ।