क्वारेन्टाईनमा योग

धनगढी

   सुदूरपश्चिम प्रदेशका बिभिन्न जिल्लाका स्थानीय तहमा क्वारेन्टाईनमा बसेकाहरुलाई तनावमुक्ति दिलाउन एबं रोग प्रतिरोधात्मक क्षमता बढाउन योग अभ्यास शुरु गरिएको छ ।

    खासगरी सुदूरपश्चिम प्रदेशमा पछिल्ला १५ दिन यता हरेक स्थानीय तहमा रहेका क्वारेन्टाईन भारतबाट आएका स्थानीयहरुले खचाखच भरिएका छन् । लामो समयेखि भारतमा बसेर फर्केकाहरु स्वदेश फर्केर पनि  घर जान नपाएर १५ दिन क्वारेन्टाईनमा बस्नुपर्ने भएपछि मानसिक तनाबमा देखिन्छन् ।

    उनीहरुमा देखिएको तनाब हटाउन र रोग प्रतिरोधात्मक क्षमता बढाउन धेरै क्वारेन्टाईनमा स्थानीय योग गुरु मार्फत योग प्रशिक्षण दिन शुरु गरिएको
छ । सेती अंचल आयुर्बेद अस्पतालका प्रमुख डाक्टर खगेन्द्र बमले भने–‘लामो समय सम्म क्वारेन्टाईनमा बस्दा मानसिक तनाब हुनसक्छ, योगको माध्यमबाट त्यस तनावलाई हटाएर सकारात्मक सोच निर्माण गर्न योग प्रशिक्षण शुरु गरेका छौं ।’

      बुधबार कैलालीको धनगढी उपमहानगरपालिका वडा नम्बर १३ मा रहेको राष्ट्रिय जनता मावि क्वारेन्टाईनमा १ घण्टा योग प्रशिक्षण दिईएको छ । खासगरी त्यसक्रममा क्वारेन्टाईनमा रहेकाहरुलाई मानसिक तनाव घटाई खुशी रहने वाताबरण संगै नियमित ब्यायाम गरि रोग प्रतिरोधात्मक क्षमता कसरी बढाउने भन्ने बारेमा सिकाउने गरिएको डाक्टर बमले बताए । उनले कैलालीका हरेक स्थानीय तहमा रहेका क्वारेन्टाईनमा दिनै पिच्छे  योग प्रशिक्षण गराउने कार्यक्रम रहेको बताए ।

   कैलालीकै टीकापुर क्षेत्रमा रहेका क्वारेन्टाईनमा पनि हरेक दिन योग प्रशिक्षण भैरहेको स्थानीय योग प्रशिक्षक छविलाल जैशीले जानकारी दिए । उनले भने–‘एक क्वारेन्टाईनमा दुई घण्टा योग प्रशिक्षण गर्ने गरेको छु, प्रशिक्षणका कारण क्वारेन्टाईनमा रहेकाहरु थोरै भएपनि तनाव मुक्त र खुशी भएका छन् ।’

    सुदूरपश्चिमका पहाडी जिल्लामा रहेका क्वारेन्टाईनमा पनि योग प्रशिक्षण शुरु गरिएको छ । बाजुरा, बझाङ, अछाम लगायतका जिल्लाहरुमा स्थानीय योग प्रशिक्षक मार्फत क्वारेन्टाईनमा प्रशिक्षण दिने गरिएको छ । बझाङ जिल्लाका स्थानीय योग प्रशिक्षक मोहन मल्लले भने –‘अहिले सदरमुकाम आसपास रहेका क्वारेन्टाईनमा योग अभ्यास गराई रहेका छौं, बिस्तारै जिल्लाका ग्रामिण क्षेत्रमा रहेका क्वारेन्टाईनमा पनि योग अभ्यास गराउँछौं ।’

  क्वारेन्टाईनमा कोरोनाको त्रासले मानसिक तनावमा रहेकाहरुलाई शारिरीक देखि मानसिक क्षमता बृद्धि गर्ने काम गरेको योग प्रशिक्षक मल्लको भनाई
छ ।

   सुदूरपश्चिम प्रदेशमा भारतबाट स्वदेश फर्कनेको संख्या दिन प्रतिदिन बढेसंगै क्वारेन्टाईनको समेत अभाव भएको छ । मानिसको चाप बढेपछि क्वारेन्टाईनको मापदण्ड विपरित क्षमता भन्दा बढी मानिसहरु राखिएको छ । योगअभ्यासका कारण थोरै भएपनि क्वारेन्टाईनमा बस्दा भएको समस्या संग जुझ्न सहज हुने चिकित्सकहरु बताउँछन ।