बिहान ७ देखि ११ बजेसम्म बजार खुल्ने

धनगढी

    धनगढीमा झण्डै अढाई महिना पछि शुक्रबार देखि लकडाउनमा खुकुलो हुने भएको छ । धनगढीका व्यवसायीले लकडाउन अवज्ञा गर्ने चेतावनी दिएपछि स्थानीय प्रशासनले बिहान ११ बजेसम्म बजार खोल्न दिने भएको छ ।

   कैलालीका प्रमुख जिल्ला अधिकारी यज्ञराज बोहराले क्रेता र बिक्रेताबीच सामाजिक दूरी र मास्क प्रयोगलाई अनिवार्य गरी बिहान ७ देखि ११ बजेसम्म बजार खोल्न दिइने बताए । विहिवार कैलाली उद्योग वाणिज्य संघ र जिल्ला प्रशासन कार्यालय बिच  लकडाउनलाई खुकुलो पार्ने मौखिक सहमति भएको छ ।

     मंगलबार कैलाली उद्योग वाणिज्य संघको नेतृत्वमा धनगढीका ब्यापारीले प्रमुख जिल्ला अधिकारीलाई ज्ञापन पत्र बुझाई  लकडाउन अवज्ञा गर्दै सम्पूर्ण बजार खोल्ने चेतावनी दिएका थिए । बुधबार स्थानीय प्रशासनले उद्योग वाणिज्य संघ, स्थानीय तहलाई छलफलमा बोलाएको थियो ।

     कैलाली उद्योग संघका अध्यक्ष पुष्पराज कुँवरले लकडाउनलाई खुकुलो पार्दै शुक्रबार देखि बिहान ७ बजेदेखि ११ बजेसम्म बजार खोल्न दिने स्थानीय प्रशासन, स्थानीय तह र व्यवसायीबीच मौखिक सहमति भएको बताए ।

 पछिल्ला केही दिन यता बिहान फाटफुट रुपमा धनगढी बजार खुल्ने गरेको भएपनि प्रहरीले बन्द गराउने गरेको थियो । दिउसो भने बजार पुर्णतया बन्द रहने गरेको भएपनि हिडडुलमा भने एकदमै खुकुलो रहेको थियो ।  यस अघि ब्यापारीहरुले लुकिछिपी ब्यबसाय संचालन गर्ने गरेको भएपनि शुक्रबार देखि भने औपचारीक रुपमै बिहान ७ देखि ११ बजे सम्म धनगढी बजार खुल्ने भएको छ ।