३३ अर्ब हाराहारीमा बजेट आउने

धनगढी

सुदूरपश्चिम प्रदेश सरकारले सोमबार (आज) आगामी आर्थिक वर्ष २०७७÷७८ को वार्षिक बजेट प्रस्तुत गर्दैछ । 

प्रदेश सभा सचिवालयका अनुसार बजेट प्रस्तुतिका लागि सोमबार अपरान्ह ४  बजे प्रदेश  सभाको  बैठक  डाकिएको छ । कोभिड  १९  महामारीले   विश्वकै आर्थिक   गतिबिधि   ठप्प   पारेको अवस्थामा प्रदेश सरकारको बजेट आउँदैछ ।

मुलुक बाहिर रोजगारी गरिरहेका अधिकांश नागरिकहरु बेरोजगार भएर घर फर्केको अवस्थामा आउन लागेको प्रदेश सरकारको बजेटलाई विशेष चासोका साथ हेरिएको छ । 

प्रदेश सरकारले ३३ अर्बको हाराहारीमा आगामी बर्षका लागि बजेट आउने जनाएको छ । ‘बजेट गोपनियताको कारण प्रस्तुत हुनु अघि धेरै भन्न नमिले पनि थोरै तल माथि होला, ३३ अर्बको हाराहारीमा बजेट रहन्छ’–आर्थिक मामिला तथा योजना मन्त्रालयका सूचना अधिकारी खगेन्द्र साउँदले भने । 

प्रदेश सरकारले यस पटक चालू आर्थिक बर्ष भन्दा थोरै घटेर संघीय सरकारबाट अनुदान आउने अनुमान गरेको छ । चालू आर्थिक बर्षमा १४ अर्ब ५० करोड अनुदान आएकोमा आगामी आर्थिक बर्षमा यस्तो अनुदान २८ करोडले घटेर १४ अकर्ब २१ करोड मात्रै आउने अनुमान गरिएको छ । 

प्रदेश सभामा प्रस्तुत भएको नीति तथा कार्यक्रममा उल्लेख भएका कार्यक्रमकै सेरोफेरोमा रहेर बजेट आउने मन्त्रालयले जनाएको छ । कोभिड १९ नियन्त्रणका लागि गरिने प्रयास र त्यसकै कारण थलिएको अर्थतन्त्र उकास्ने गरी बजेट आउने आर्थिक मामिला तथा योजना मन्त्री झपट बहादुर बोहराले बताए । उनले यसपटकको बजेटले कृषि क्षेत्रलाई प्राथमिकतामा राखेको जानकारी दिए । 

प्रदेशमा पूर्वाधार निर्माणका कामहरु पनि आवश्यक रहेकोले बजेटको ठूलो हिस्सा पूर्वाधार विकासमै जाने भए पनि कृषि र कोभिड १९ माहमारी र स्वास्थ्य क्षेत्रपनि प्रदेश सरकारको मुख्य प्राथमिकतामा परेको मन्त्रालयका सूचना अधिकारी साउँदले बताए ।