गौरीफन्टा नाकाबाट भित्रिने पर्यटकको संख्या न्यून

धनगढी । कैलालीको गौरीफन्टा नाका पाँच वर्षपछि पर्यटकहरुका लागि खुल्ला भएसँगैै न्यून संख्यामा पर्यटकहरुको आगमन भएको छ ।

कोरोना भाइरस (कोभिड–१९) ले गर्दा बन्द रहेको उक्त नाका २०८१ असोज २४ गतेदेखि मात्रै खुल्ला भएको हो । लामो समयसम्म बन्द रहेको नाका खुलेसँगै न्यून संख्यामा पर्यटकहरु भित्रिने गरेका छन् । 

अध्यागमन कार्यालय मोहना धनगढीकी सूचना अधिकारी शान्ति बुडाका अनुसार नाका खुलेपछि २९ जना पर्यकहरुको आगमन भएको छ, भने ३३ जना नाकाबाट बाहिरीएका छन् । कोभिडमा बन्द गरेको भारत सरकारले केही महिना अघि मात्रै नाका खुल्ला गरेको उनले बताइन् । 

गौरीफन्टा नाका भएर संयुक्त राज्य अमेरिका, अस्टेलिया, जेनेभा, युके, फिलिपन्सि, थाल्याण्ड, पोल्याण्ड, न्युदरल्याण्ड र क्यान्डालगायतका देशहरुबाट पर्यटकहरु आउने गर्छन् । उक्त नाकाबाट जिम्बाबे, सुजरल्याण्ड, कोम्रोङ, सोमल्याण्ड, सिरिया, लिभेनिया, इन्थोपिनिया, अफगानस्थान र पाकिस्तानका पर्यटकहरु भित्रिन पाउँदैनन्  ।

सूचना अधिकारी शान्ति बुडाका अनुसार फागुन, चैत्त, वैशाखमा धेरै पर्यटकहरु भित्रिने गरेका छन् । यो समयमा सगरमाथा जानका लागि पर्यटकहरु आउने गरेको उनले बताइन् । दशैँ र तिहारको समयमा बढी पर्यटकहरु आउने गरेको भएपनि अरु समयमा धेरै कम पर्यटकहरु आउने गरेको उनको भनाइ छ । 

उनले भनिन्, ‘महिनामा दुई÷चार जना सम्म आउँछन् । कहिले त एक महिनासम्म पनि पर्यटक आउँदैनन् ।’ सूचना प्रविधिका कारणले गर्दा आफूहरु सँग भाषाको कुनै पनि समस्या नरहेको उनले बताइन् । 

नेपाल एसोसिएसन अफ टुर तथा ट्राभल एजेन्ट्स (नाटा) सुदूरपश्चिम प्रदेश अध्यक्ष पदम विक्रम सिंहले सुदूरपश्चिम पर्यटनको हिसाबले ठूलो सम्भावना भएको प्रदेश रहेको बताए । आफूहरुले पर्यटन सम्बन्धी थुप्रै कार्यक्रम लगायत प्रचार प्रसार गर्दै आइरहेको उनले बताए । राज्यले जब सम्म पर्यटनमा लगानि गर्दैन तब सम्म पर्यटकहरुको संख्यामा बढ्न नसक्ने उनले बताए । 

‘पर्यटन नीति नै छैनन् । सुदूरपश्चिम प्रदेशमा भर्खरै पर्यटन नीति बन्दैछ । त्यो पनि व्यवसायमैत्री नीति छैनन् । त्यसले गर्दा खेरी यहाँ पर्यटन व्यवसायीहरु सुदूरपश्चिममा लगानी लगाउन डराउने अवस्था छ । की भने त्यो खालको नीति ल्याउनु प¥यो । त्यो खालको व्यवसायमैत्री कानुन ल्याउनु प¥यो । व्यवसायहरुलाई सहजिकरण गर्नु प¥यो,’ उनले भने । 

राज्यले नीजि क्षेत्रहरु सँग समन्वय सहकार्य गर्नु सकेमा पर्यटकहरु लाई भित्राउन सक्ने उनले बताए । पर्यटन सम्बन्धी दक्षजनशक्तिको पनि समस्या रहेको उनको भनाइ छ । रान्यले पर्यटन सम्बन्धी नीति नियमहरु परिमार्जन गर्दैन तब सम्म पर्यटकहरुको संख्यामा कमी नै आउने उनले बताए । 

प्रदेश पर्यटन विकास कार्यक्रम कार्यान्वयन इकाई धनगढीका प्रवक्ता दानबहादुर थापाले प्रदेश सरकारले पर्यटनमा विनियोजन गरेको बजेट मात्रै कार्यन्वयन गर्ने कामहरु भइरहेको बताए । आफूहरुले पर्यटन प्रवद्र्धनमा कुनै पनि कामहरु गर्ने नसकिएको उनले बताए । 

प्रदेश सरकारले १० वर्षीय पर्यटन सम्बन्धी मास्टर पलान बनाएको भएपनि बजेट विनियोजन हुन नसक्दा पर्यटन सम्बन्धी उल्लेखेनिय कामहरु गर्ने नसकिएको उनको भनाइ छ ।