उतार चढावमा सुदूरपश्चिमको कोरोना संक्रमण दर

धनगढी

 चैत १४ गते पहिलो व्यक्तिमा कोरोना संक्रमण पुष्टी भएको सुदूरपश्चिम प्रदेशमा साउन ३१ सम्म आइपुग्दा चार हजार ८ सय ३४ जना संक्रमित भइसकेका छन् ।

 तर संक्रमणको दरमा भने उतार चढाब भईरहेको छ । चैत १४ देखी चैत २९ सम्म पाँच जनामा संक्रमण देखिएको थियो । त्यसपछिका ४१ दिन सम्म कुनै व्यक्तिमा संक्रमण पुष्टि भएन । ४२ औं दिन जेठ ९ गते सुदूरपश्चिममा थप पाँच जनामा संक्रमण पुष्टि हुँदा प्रदेशमा कुल संक्रमितको संख्या १० पुगेको थियो । तर जेठ ९ पछि संक्रमण दर निक्कै बढेको थियो । जेठ ९ देखी असार १९ गते सम्म सुदूरपश्चिममा ३ हजार ५ सय ३० जना संक्रमित थपिएका हुन् ।

 जेठ १९ गते नै सुदूरपपिश्चममा हाल सम्मकै सवैभन्दा बढी ४ सय ९८ जनामा संक्रमण पुष्टि भएको थियो । ४ सय ९८ संगै असार १९ सम्म सुदूरपश्चिममा कुल कोरोना संक्रमितको संख्या तीन हजार ५ सय ३५ पुगेको थियो । पहिलो संक्रमण देखिएको दिन (चैत १४ ) देखी ५४ दिन (जेठ ८) सम्म ५ जना संक्रमित रहँदा जेठ ९ देखी असार १९ (४२ दिन) तीन हजार पाँच सय ३० जनामा संक्रमण पुष्टि भएको थियो ।

  असार २० देखी असार ३१ सम्म फेरी सुदूरपश्चिममा संक्रमण दर फेरी घटेको   थियो । सो अवधीमा ४ सय ४३ जनामा संक्रमण पुष्टि हुँदा कुल संक्रमितको संख्या ३ हजार ९ सय ७८ पुगेको थियो ।

 असार २० देखी असार ३० सम्म सुदूरपश्चिममा संक्रमण दर केही घटेपनि साउन १ गते देखी पुनः संक्रमण दर बढ्दै गयो । साउन १ गते देखी बढेको संक्रमण दर साउन १६ सम्म कायम रहेको थियो । सो समयमा सुदूरपश्चिममा पाँच सय ३७ जना नयाँ संक्रमित थपिएका थिए । साउन १६ देखी ३१ सम्म पुनः संक्रमण दर ओरालो लाग्दै आएको छ । पछिल्लो १५ दिनको अवधीमा सुदूरपश्चिममा तीन सय ८ जनामा संक्रमण पुष्टि भएको छ ।

   यसरी पटक पटक संक्रमण दर घट्ने र बढ्ने क्रम जारी रहँदा सुदूरपश्चिममा अवका दिनमा संक्रमणको अवस्था कस्तो हुने भन्ने निक्यौल गर्न सक्ने अवस्था नरहेको स्वास्थ्यकर्मी बताउँछन् । सेती प्रादेशिक अस्पतालका जनरल फिजिसियन डाक्टर शेरबहादुर कमरले भारतबाट नागरिक कम आउँदा संक्रमण कम हुने र बढी आउँदा संक्रमितको संख्या पनि बढ्ने गरेको बताए ।

  ‘अहिले सम्म कोरोना संक्रमण दर भारतबाट आउने नागरिकको संख्यामा भर परेको छ’ उनले भने–‘तर समुदाय स्तरबाट हाल सम्म स्वाव परिक्षण हुन सकेको छैन, समुदाय स्तरमा परिक्षण भए फेरी संक्रमण दरमा उतारचढाब आउन सक्दछ ।’

  सुदूरपश्चिम प्रदेश स्वास्थ्य निर्देशनालयका निर्देशक डाक्टर गुणराज अवस्थीले भने हाल सम्म समुदायमा संक्रमण फैलिएको भन्ने कुनै प्रमाण नभेटिएको बताए । ‘केही स्थानमा क्वारेन्टिनबाट घर गएपछि कोरोना पुष्टी भएपछि ती स्थानलाई सील गरी संक्रमितको सम्पर्कमा आएका हरुमा परिक्षण गरिएको छ’ निर्देशक अवस्थीले भने–‘त्यसबाहेक समुदायका नागरिकमा हाल सम्म कोरोना पुष्टि भएको छैन ।’