यात्रु आउने आशामा यातायात व्यवसायी

धनगढी

  साउन ८ गते देखी जिल्ला भित्र सञ्चालन गर्न पाउने गरी  सार्वनिक यातायातका साधन सञ्चालन भएपनि उनिहरुले अझै यात्रु पाउन सकेका छैनन् ।

    व्यवसायी भने यात्रु आउने आशामा सडकमा बस गुडाई रहेका      छन् । ‘हरेक दिन यात्रु आउने आशमा बिहानै देखी सडकमा बस लगाउने गरेका छौं’ ना. ४ ख ८४३१ नम्बरको बसमा कार्यरत व्यवसायी चेतनाराण भट्टराईले भने– तर यात्रु आउँदैनन्, यात्रुको बानी बसाउन दुईचार जना भएपनि ओसार्ने गरेका छौं ।’ बस चलाएको तीन दिनमा सधै घाटा भएको बताउँदै उनले यात्रुलाई बस खुलेको जानकारी दिन यस्तो कदम चाल्नु परेको बताए । यात्रु नआएका कारण धेरै सार्वजनिक बस भने अझै सञ्चालनमा आउन नसकेका उनले बताए ।

ना ७ ख २३१ नम्बरको बसका सह–चालक उमेस चौधरीले तीन दिनमा बस चलाउँदा साहुले घरबाट पैसा ल्याएर तेल भरेको बताए । ‘बसमा दुई चार जना आउँछन्’ उनले भने–‘उनिहरुबाट उठेको भाडाले बाटो खर्च पुग्दैन, नाफाको त कुरै छोडौं ।’ धेरै यात्रुले सार्वजनिक बस खुलेको जानकारी नपाएको र कतिपय यात्रु कोरोनाको डरका कारण यात्रा गर्न हिच्किचाउने गरेको उनले बताए ।

४ महिना लामो लकडाउन पछि साउन ८ गते देखी छोटो दुरीका सार्वजनिक यातायात सञ्चालनमा आएपनि बसमा सवार गर्ने यात्रु नपाएपछि दुई चार बाहेक सवै सार्वजनिक बस धनगढी बसपार्कमै थन्किएका उनले बताए । ‘यात्रु आउछन्की भनेर गाडी खुलेको दिन देखी सडकमा गाडी गुडाई रहेका छौं’ ना ७ ख २३१ नम्बर बस चालक रुपलाल चौधरीले भने–‘तर यात्रु आउन मानिरहेका छैनन्, यस्तै भए गाडी थन्काउनुपर्ने अवस्था आउन सक्दछ ।’ पहिलाको जसरी यात्रुलाई जबरजस्ती बसाउन पनि नमिल्ने भन्दै उनले कोरोनाको त्रास नै यात्रु नआउने प्रमुख कारण भएको बताए ।

 बस चालक प्रेम बोहराले सरकारले पहिलेकै दर रेटमा भाडा कायम गरेर विना सर्त यात्रु ओसार्न पाउनुपर्ने बताए । ‘एउटा सिटमा एकजना मात्रै राखेर बस गुडाउँदा छोटो दुरीमा धेरै यात्रु भर्न सकिदैन’ उनले भने बरु पुरानै भाडामा क्षमता अनुसार यात्रु राख्न पाउनुपर्ने व्यवस्था गरे केही नाफा कमाउन सकिन्थ्यो ।’

 सुन्दर सुदूरपश्चिम यातायात प्रालिका अध्यक्ष पदम सापकोटा पनि छोटो दुरीमा एउटा सिटमा एक जना यात्रु राखेर सम्भव नहुने बताउँछन् । ‘छोटोदुरीमा यात्रु आउने झर्ने भइरहन्छ’ उनले भने–‘यस्तो अवस्थामा सीमित यात्रु राखेर मात्रै हुँदैन, जहाँपायो त्यही चढाउने र उतार्ने गर्दा सरकारी मापदण्डको पालना गर्न समस्या छ ।’

 सार्वजनिक बसमा यात्रा गर्दा यात्रुले आफ्नो सुरक्षा आफै गर्ने भन्दै उनले व्यवसायी र चालकले मात्रै मापदण्डको पालना गरे  यात्रु नै नआउने बताए ।  ‘ज्यानको माया सवैलाई हुन्छ’ उनले भने–‘कोरोना संक्रमणबाट बच्न यात्रुले नै आवश्यक तयारी गरिहाल्छन ।’ सरकारले साउन १ गते देखीनै छोटो दुरीका सार्वजनिक बस सञ्चालन गर्ने अनुमति दिएको भएपनि व्यवसायीले विभिन्न माग राख्दै यातायात सञ्चालन गरेका थिएनन् ।

  यातायात व्यवसायी र सरका विच साउन ६ गते भएको सहमति पछि मात्रै बिहीबार देखी व्यवसायी गाडी चलाउन सहमत भएका थिए । सुदूरपश्चिममा केही सार्वजनिक यातायातका बस भने भदौ ४ गते देखीनै सञ्चालनमा आएका थिए । सार्वजनिक यातायात महाँसंघमा आवद्ध सवारी साउन ४ गते देखी नै सुदूरपचिमका ९ वटै जिल्लामा आन्तरिक रुपमा सञ्चालनमा आएका हुन् ।