सुदूरपश्चिममा कुन दलको कति छ मतभार ?

धनगढी । आगामी माग ११ गते हुने राष्ट्रिय सभा निर्वाचनका लागि सुदूरपश्चिमको धनगढीमा तीन दलका तर्फबाट ६ जनाले उम्मेदवारी दर्ता गराएका छन् ।

सुदूरपश्चिमबाट राष्ट्रिय सभा सदस्य निर्वाचित भएका नेकपा माओवादी केन्द्रका हरिराम चौधरी (उत्सव), महेश महरा र नेकपा एमालेका इन्दु कडरियाको कार्यकाल फागुन २० गते सकिंदै छ । रिक्तहुने तीन सीटका लागि शत्तारुढ गठबन्धनबाट नेपाली कांग्रेस र नेकपा माओबादी केन्द्रले उम्मेदवारी दिएका छन् भने नेकपा एमालले पनि रिक्त हुने पदमा उम्मेदवारी दिएको छ ।

नेपाली कांग्रेसले अपाङ्क कोटा र अन्य कोटाबाट उम्मेदवारी दिएको छ भने, नेकपा माओबादी केन्द्रले महिलाको कोटामा उम्मेदवारी दिएको छ ।

नेपाली कांग्रेसका तर्फबाट अपाङ्गकोटामा कैलाली सभापति नारायण्दत्त भट्ट तथा अन्य कोटामा अत्तरियाका बलदेव बोहराले उमेदवारी दिएका हुन् भने नेकपा माओबादी केन्द्रबाट महिला कोटामा बैतडीकी रेणु चन्दले उम्मेदवारी दिएकी छन् ।

नेकपा एमालेबाट अन्यतर्फ कञ्चनपुरका ईश्वरी खरेल, महिलातर्फ कैलालीकी सावित्री घिमिरे र अपांगतातर्फ कैलालीकै रामचन्द्र जोशीले उम्मेदवारी दिएका छन् ।

निर्वाचनमा प्रदेश सांसद र स्थानीय तहका प्रमुख र उप प्रमुख मतदाता हुने प्रावधान रहेको छ । सो अनुसार सुदूरपश्चिम प्रदेशमा नेपाली कांग्रेसको मतभार सवै भन्दा बढी रहेको देखिन्छ ।

राष्ट्रिय जनगणना २०७८ को जनसंख्या लाई आधार मानेर निर्वाचन कार्यालयले मतभारको टुङ्गो लगाउने गर्दछ ।

राष्ट्रिय तथ्यांक कार्यालयको सिफारिससमेत आधारमा राष्ट्रियसभा सदस्यको पदका लागि मतदाता रहेका प्रदेशसभा सदस्यको ५३ र गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभारका दरले गणना हुने गरी निर्वाचन आयोगबाट निर्णय भएको छ । यसअघि राष्ट्रियसभा सदस्य निर्वाचनमा उक्त मतभार प्रदेशसभा सदस्यका लागि ४८ र गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १८ रहेको थियो ।

५२ जना प्रदेशसभा सदस्य रहेको सुदूरपश्चिम नेपाली कांग्रेसका १८ जना, नेकपा एमालेका ११ जना, नागरिक उन्मुक्ति पार्टीका ७ जना, नेकपा एकीकृत समाजवादीका ४ जना सदस्य रहोक छन् । सुदूरपश्चिममा राप्रपाका एक जना प्रदेश सभा सदस्य छन् भने एक जना स्वतन्त्र प्रदेश सभा सदस्य रहेका छन् ।

त्यसैगरी स्थानीय तहमा नेपाली कांग्रेस सवैभन्दा ठुलो दर रहेको छ । नेपाली कांग्रेससंग प्रमुख र उप प्रमुख गरी सुदूरपश्चिममा ८८ जना स्थानीय तहका जनप्रतिनिधि रहेका छन् ।

जस अनुसार नेपाली कांग्रेसको स्थानीय तहमा मात्रै १ हजार ६६ मतभार छ, भने प्रदे सभामा उसको मतभार ९ सय ५४ हुन्छ । यसरी सुदूरपश्चिममा राष्ट्रिय सभा निर्वाचनको लागि कांग्रेस एक्लैको मतभार २ हजार पाँच सय ८८ रहेको छ ।

एमालेले स्थानीय तहमा २४ प्रमुख र २६ उपप्रमुख जितेको छ । एमालेले स्थानीय तहको मतभार ९ सय ५० र प्रदेश सभाको मतभार ५ सय ८३ रहेको छ । यसरी सुदूरपश्चिममा एमालेको कुल मतभार १ हजार ५ सय ३३ रहेको छ ।

नेकपा माओवादी केन्द्रले सुदूरपश्चिम प्रदेशमा १४ पालिका प्रमुख र ११ पालिका उपप्रमुख जितेको छ माओवादीको स्थानीय तह र प्रदेशसभाको कुल मतभार १ हजार ५ रहेको छ । नागरिक उन्मुक्तिले स्थानीय तहमा ४ प्रमुख र ३ उपप्रमुख जितेको छ । सो पार्टीको प्रदेश र स्थानीय तहको मतभार ५ सय ४ रहेको छ । यसैगरी नेकपा एकीकृत समाजवादी पार्टीले दुई स्थानीय तह प्रमुख र तीन स्थानीय तहमा उप प्रमुख पद जीतेको छ । यसैगरी नेकपा एसका प्रदेश सभामा चार जना सदस्य रहेका छन् । दवै क्षेत्रको नतिजा जोड्दा सुदूरपश्चिम प्रदेशमा नेकपा एसको मतभार तीन सय ७ रहेको । २ पालिकामा स्वतन्त्र लडेको उम्मेदवारले प्रमुख जितेका छन् भने प्रदेश सभामा पनि एकजनाले स्वतन्त्र जितेका छन् । उनीहरूको मतभार ९१ छ । राप्रपाको मतभार सुदूरपश्चिममा ५३ मात्रै छ । यहाँ एकजना प्रदेशसभा सदस्य छन् ।